tableeGh meN Hikmat aur shafqat ki ri'aayat

[yasir shah]

tableeGh meN Hikmat aur shafqat

deen ki tableeGh yooN to har jagah Hikmat aur daanishmandee chaahtee hay , laiken jo shakhS shub.haat kaa mareeZ ho , us kaa i'laaj baRaa naazuk kaam hay , is meN daa'i-e-Haq ke liye intihaa darjay kaa Sabr-o-taHammul ' mukhaat'ib par shafqat , Hikmat-o-daanaaee aur baat ko dil meN utaar dene ki lagan ki Zaroorat hay -aaj aik Hadeec naZ'ar se guzree jis se andaazah hotaa hay keh aaN.HaZrat SalAllaahu.'alaihiwasallam shubhaat ke mareeZ kaa i'laaj kis t'araH farmaatay thay?

HaZrat Aboo Amaamah raZiAllahu.ta'aalaa a'nhu riwaayat kartay heN keh aik quraishee nojawaan aaN.HaZrat SalAllaahu.'alaihiwasallam ki khidmat meN haaZir huwaa aur us ne aik a'jeeb-o-Ghareeb farmaaish kee , kahnay lagaa :

"yaa rasoolAllah ! mujhe zinaa karnay ki ijaazat day deejiye"

taSawwur to farmaaiye keh yeh ghanaaoonee farmaaish kis se kee jaa rahee hay ? us zaat-e-aqdas SalAllaahu.'alaihiwasallam se keh jis ke taqaddus ke aagay farishtay bhi haich heN ' aur farmaaish bhi kisee ChoTay moTay gunaah ki naheeN, zinaa kee ! woh gunaah jis kaa naam aik shareef insaan zabaan par laatay huwe bhi sharmaataa hay -koi aur hotaa to shaayed is gustaakhee ki sazaa meN nojawaan ko dhakkay day kar baahir nikalwaa daitaa- chunaaNcheh HaaZireen-e-majlis us nojawaan par baras paRay aur usay DaaNTnaa DipaTnaa shuroo' kar diyaa -laiken qurbaan jaaiye us raHmat-e-mujassam SalAllaahu.'alaihiwasallam ke , aap (SalAllaahu.'alaihiwasallam) ne bhaaNp liyaa keh yeh shakhS Zid aur i'naad kaa naheeN ,shubhaat kaa mareeZ hay aur yeh GhuSSah aur nafrat ke bajaa.ay shafqat kaa aur taras Khaanay kaa mustaHiq hay -aap (SalAllaahu.'alaihiwasallam) ne SaHaabah ko DaaNTnay se rokaa , aur us se farmaayaa : "mere qareeb aa jaao" jab woh qareeb aa gayaa to aap (SalAllaahu.'alaihiwasallam) ne us se farmaayaa :

"kyaa tum is a'mal ko apnee maaN ke liye pasand kartay ho ?"

nojawaan bolaa: "naheeN ! Allah mujhe aap par qurbaan karay , khudaa ki qasam' naheeN !"

aap (SalAllaahu.'alaihiwasallam) ne farmaayaa : "to aur log bhi apnee maaoN ke liye is ko pasand naheeN kartay-"

Phir farmaayaa "aChChaa to kyaa tum apnee baiTee ke liye is a'mal ko pasand kartay ho ?"

"naheeN yaa rasoolAllah ' mujhe Allah aap par fidaa karay ' khudaa ki qasam naheeN " us ne kahaa

aap (SalAllaahu.'alaihiwasallam) ne farmaayaa :"to aur log bhi isay apnee baiTiyoN ke liye pasand naheeN kartay-"

"aur kyaa tum apnee bahan ke liye is a'mal ko pasand kartay ho ?"

"naheeN yaa rasoolAllah ' Allah mujhe aap par nicaar karay ,khudaa ki qasam naheeN !" nojawaan ne kahaa

aap (SalAllaahu.'alaihiwasallam) ne farmaayaa "to aur log bhi apnee bahnoN ke liye is ko pasand naheeN kartay -"

"aur kyaa tum apnee PhooPhee ke liye isay pasand kartay ho ?"

"naheeN yaa rasoolAllah, khudaa mujhe aap par qurbaan karay , khudaa ki qasam naheeN !" nojawaan bolaa-

"to aur log bhi isay apnee PhooPhiyoN ke liye pasand naheeN kartay , aur kyaa tum isay apnee khaalah ke liye pasaNd kartay ho ?"

"naheeN yaa rasoolAllah , khudaa mujhe aap par qurbaan karay , wAllah naheeN " nojawaan bolaa

"to aur log bhi isay apnee khaalaaoN ke liye pasand naheeN kartay-"


----------


yeh farmaa kar aap (SalAllaahu.'alaihiwasallam) ne apnaa dast-e-shafqat nojawaan par raKhKhaa aur farmaayaa :

"yaa Allah ! is ke gunaah mu'aaf farmaa , is ke qalb ko paakeezagee a't'aa farmaa aur i'ffat a't'aa farmaa"

HaZrat Aboo Amaamah raZiAllahu.ta'aalaa.a'nhu farmaatay heN keh is waaqi'ah ke ba'd nojawaan itnaa paak daaman ho gayaa keh kisee t'araf iltifaat hi naheeN kartaa thaa- Imaam Haishmee (RaHmatullahu a'laihi) farmaatay heN keh is ki sanad "SaHeeH" hay


______________________

maakhooz az "taraashay"
taSneef-e-"Muftee Taqee Usmaanee"

[sbashwar]

Yasir saheb, Allah hum sab ko mahfouz rakhe. Hikmat se sahi baat phounchayi jaye tu dil mein utarti hai.

[yasir shah]

Sbashwar SaaHib

jazakAllah !