Sher ke doosre misre ke pehle/aakhri alfaaz se sher kahiye!

Post by **Shummu** » Fri Dec 17, 2004 10:34 am

Salaam sab ko!

Jaisa ki subject se zaahir hota hai...yahan jo sher koi likhega to agla shaks us sher ke doosre misre ke pehle ya aakhri alfaaz se agla sher chaspaaN karega! (this is to make it tough) aur next sher likhte waqt US LAFZ ko zaroor highlight kar ke likhiyega jisse aap NEXT SHER likh rahe hain.

SHUKRIYA....!

Main aaGhaaz karti hoon...

Urdu hai jis ka naam hum hi jaantay hain daag
Saaray jahan may dhoom hamaree zabaN ki hai

ab is sher mein se doosre misre ke pehle/aakhri lafz se next sher irsaal karein :)

Shumaila

Post by **Hashmat Usmani** » Fri Dec 17, 2004 6:58 pm

salaam shummu...bahot Khoob silsila shur'u kiyaa hai. thank you.

hai ab is ma'moora meN qai'Ht-e-Gham-e-ulfat, "Asad!"
ham ne yeh maanaa ki Dilli meN raheN, khaaveNge kia? :-o

Ghaalib

agla sher lafz-e-"ham" ya "kia" se marHamat farmaaiye, shukria.

Post by **Shummu** » Fri Dec 17, 2004 8:12 pm

shukriya!

HAM

ham tarasate hii taraste hii tarasate hii rahe
vo falaane se falaane se falaane se mile

kaif bhopali

next with VO/MILE

Post by **Shummu** » Sat Dec 18, 2004 12:36 pm

wah Nazir sahab...aap ko is thread mein dekh kar bahut khushi hui.shukriya!

aur ab aap ke second misre ke pehle(har) ya aakhri(mujhe) se sher kehna hoga..!!

HAR

Har aik baat pe kehte ho tum ke tuu kyaa hai
tum hi kaho keh ye andaaz-e-guftuguu kyaa hai?!

NEXT with TUM/HAI

Post by **Ibn-e-siddique** » Sun Dec 19, 2004 11:23 am

mire ash'aar ae Iqbal kyuN pyaare na hoN mujh ko
mire Toote hue dil ke ye dard angeiz naale haiN

mire yaa haiN

Post by **Shummu** » Sun Dec 19, 2004 11:35 am

Amjad jee thanx for ur participation....bahut accha sher sunaaya hai aapne :D

HAIN

hain aur bhi dunyaa mein sukhanwar bahut achche
kehte hain GHALIB ka hai andaaz-e-bayaaN aur

Post by **Ibn-e-siddique** » Sun Dec 19, 2004 11:37 am

aur

aur baazaar se le aaye agar TooT gayaa
saaghar-e-jam se miraa jam-e-sifaal acha hai

Post by **Hashmat Usmani** » Sun Dec 19, 2004 1:31 pm

HAI

hai dil-e-shoriida, "Ghaalib!", tilism-e-pech_o_taab
rai'Hm kar apnii tamanna par, ki kis mushkil meN hai

rai'Hm ya hai se agla she'r, plz.

Post by **Shummu** » Sun Dec 19, 2004 1:33 pm

HAI

Hai kis ka intizaar mujhe kuch khabar nahi
kab aayegi bahaar mujhe kuch khabar nahi

Amjad Islam Amjad

KAB/NAHI

Post by **Hashmat Usmani** » Sun Dec 19, 2004 1:40 pm

NAHIIN

nahiiN minnat_kash-e-taab-e-shuniidan daastaaN merii
Khamoshii guftugu hai, be_zubaanii hai zubaaN merii

'allaamah Iqbaal

agla she'r lafz-e-"Khaamoshii/Khamoshii/Khaamshii" ya lafz-e-"merii" se, plz.

Post by **Ibn-e-siddique** » Sun Dec 19, 2004 5:10 pm

khaamushi keh rahi hai kaan meiN kiya
aa rahaa hai mire gumaan meiN kiya?

Post by **Hashmat Usmani** » Sun Dec 19, 2004 7:32 pm

KIA

kia miliye aise logoN se jinkii fitrat chhupii rahe
naqlii chehra saamne aaye, asli soorat chhupii rahe

agla she'r lafz-e-"naqlii" ya lafz-e-"rahe" se, plz.

Post by **Ibn-e-siddique** » Sun Dec 19, 2004 9:43 pm

rahe saath tiraa pyaar zindagi ban kar
ye aur baat meri zindagi vafaa na kare

Post by **Hashmat Usmani** » Sun Dec 19, 2004 11:43 pm

KARE

kare hai qatl, lagaavaT meN tiraa ro denaa
terii taraH, koii teGh-e-nigeh ko aab to de!

Ghaalib

lafze-e-"terii" ya "de" se agla she'r marHamat farmaaiye, shukria.

Post by **Ibn-e-siddique** » Mon Dec 20, 2004 4:45 am

de

de wo jis qadar zillat ham hansi meiN TaaleN ge
baare aashna nikla , unka paasbaaN apna

ghalib