aa'iye hum sab milkar baargaah e rabbul izzat meN duAa maaNg

[ismail ajaz]

aa'iye hum sab milkar baargaah e rabbul izzat meN duAa maaNgeN

aiHsaas e nidaamat bhee huwaa hai sadaa mujhe
meree Khataa'oN kee jo sazaa de Khudaa mujhe

maiN sab se baaKhabar rahaa ,aur tujh se beKhabar
yeh qalq aur afsos hai , rabbul ulaa mujhe

ho humsafar har ek hee abb meraa humKhayaal
de fikr o fan , soch kee aisee kalaa mujhe

maiN SubH o shaam aaKhirat ke Gham meN hee jiyuN
aisee sabeel e muStafaa kee de ziyaa mujhe

maiN maqSad e Hayaat par rakkhooN nazar tamaam
yuN nafs aur shaitaan se maalik bachaa mujhe

de Aajizee o inkisaaree , ilm e ma'Arifat
aur aagahee , sha'oor ko tuu de sikhaa mujhe

aayaa hooN teree baargaah meN iltijaa liye
kar maGhfirat kee maut mere rab ataa mujhe

arz e "Khayaal" hai yeh faqat dostoN se aaj
rakhiye humeshah yaad bhee waqt e duAa mujhe

Ismail Ajaz Khayaal

[Nayeem Khan]

Aapki dua mein hum bhi shamil haiN. Allah qubool farmaye. Ameen.

[Tanwir Phool]

SUBHAAN ALLAH , JAZAAK ALLAH
Hamaisha du'aaoN maiN yaad rakhi'ey
Taalib-e-Du'aa
Tanwir Phool
http://www.globalurduforum.org/authors/view/485