aap kee Zarrah nawaazee ! dil miraa ghaa'il huwaa

[ismail ajaz]

ek tazaah kalaam ke saath Khayaal kaa aihl e bazm ko salaam
Arz se Khidmat hai

aap kee Zarrah nawaazee ! dil miraa ghaa'il huwaa
aap kee nazar e Enaayat kaa bhee maiN qaa'il huwaa

raNjisheN baRhne lageeN tafreeq aapas meN hu'ee
dostoN ke darmiyaaN jab bhee Adoo Haa'il huwaa

aitbaar aisaa uThaa mashkook rishte ho ga'ey
bhaa'ee bhaa'ee se judaa hone ko hai maa'il huwaa

kibr kee ooNchee Emaarat aaj hai girne lagee
waqt ne kaayaa palaT dee baadshah saa'il huwaa

jisqadar baRhtee ga'eeN unkee sitam ZareefiyaaN
usqadar meraa "Khayaal" dard e dil zaa'il huwaa

Ismail Ajaz Khayaal