aalaam-e-rozgaar ko Thukraa rahaa hooN maiN!

Kuhnah mashq ShoAraa kaa kalaam jo beHr meiN hounaa zaroori hei

Moderator: Muzaffar Ahmad Muzaffar

Post Reply
Sarwar A. Raz
-
-
Posts: 518
Joined: Sat Jan 01, 2005 3:18 pm
Location: Fort Worth, Texas
Contact:

aalaam-e-rozgaar ko Thukraa rahaa hooN maiN!

Post by Sarwar A. Raz »

yaaraan-e-bazm: aadaab!

Urdu Anjuman ke t^araHee mushaa,i'reh ke liYe janaab Seemab Akbarabadi kaa miSra' diyaa gayaa hai:

"le jaa rahaa hai shauq chalaa jaa rahaa hooN maiN"

is zameen meN meree koshish HaaZ^ir hai. raaYe kaa intiz^aar rahe gaa. shukriyah!

Sarwar A. Raz "Sarwar"

================================
Ghazal

aalaam-e-rozgaar ko Thukraa rahaa hooN maiN
Thukraa rahaa hooN aur jiYe jaa rahaa hooN maiN!

Khud hee tamaashbeen-o-tamaashaa rahaa hooN maiN
is bazm-e-naaz meN tiree kyaa kyaa rahaa hooN maiN!

aaGhaaz-e-i'shq soch ke dil Khush thaa kis qadar
anjaam-e-i'shq dekh ke pachhtaa rahaa hooN maiN

dasht-e-umeed, aablah-paayee, Ghubaar-e-raah
manzil se be-niyaaz chalaa jaa rahaa hooN maiN

waamaaNdagee-e-hastee-e-marHoom kyaa kahooN
jaise koyee gunaah kiYe jaa rahaa hooN maiN!

akcar maqaam-e-dehr meN Khud se thaa be-niyaaz
akcar maqaam-e-dehr meN tanhaa rahaa hooN maiN

maiN Khud hee apnee aaNkh kaa ashk-e-malaal hooN
apne hee lab kaa Harf-e-tamannaa rahaa hooN maiN!

laZZat-kash-e-fareb-e-umeed-e-shab-e-wiSaal
afsaanah-e-Hayaat ko duhraa rahaa hooN maiN

apnoN peh iKhtiyaar nah GhairoN kaa e'tibaar
aaKhir yeh kis Khat^aa kee sazaa paa rahaa hooN maiN?

too Khandah-zan hai Haal peh mere jo is t^araH
kyaa tujh ko kuchh bhee yaad naheeN kyaa rahaa hooN maiN?

kab raah-e-a'ashiqee meN mujhe apnaa hosh hai!
"le jaa rahaa hai shauq, chalaa jaa rahaa hooN maiN!"

poochhooN nah kaise "Sarwar"-e-shoreedah-sar kaa Haal
Khud bhee to jaur-e-zeest kaa maaraa rahaa hooN maiN!

====================


Attachments
gg-aalaam-e-rozgaar_cr.gif
gg-aalaam-e-rozgaar_cr.gif (18.85 KiB) Viewed 166 times
gg-aalaam-e-rozgaar.gif002_cr.gif
gg-aalaam-e-rozgaar.gif002_cr.gif (8.09 KiB) Viewed 166 times
yooN aur bohat a'ib haiN :Sarwar: meN wa-lekin
kambaKht muHabbat meN to yaktaa nazar aayaa

Sarwar A. Raz :Sarwar:
Post Reply