تمام چاہنے والوں کی خدمت میں خیالؔ کا آداب
ایک چار سال پرانا کلام آپ احباب کے ذوق اور بصارتوں کی نذر، امید ہے وقت کی چال اور اس کی رفتار کے مطابق پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لوگوں کو شکایت تھی ہم آشفتہ سروں سے
کیوں نکلے ہو تم اوڑھے کفن اپنے گھروں سے
منزل سے بہت دور ہمیں لے کے گئے وہ
چہرے جو سجائے تھے ہوئے راہبروں سے
تعلیم و تعلّم سے ہے مستثنیٰ مُعَلِّم
کج خلق ہے کیوں پوچھیے تو معتبروں سے
جینے کے لیے موت کا سامان ہوا پھر
بیماروں نے جب عہد کیے چارہ گروں سے
نفرت کی ہوا خوب چلی سارے جہاں میں
الفت کی تجارت نہ ہوئی پیشہ وروں سے
دن رات وہاں گونجے ہے پازیب کی جھنکار
آتی تھی تلاوت کی صدا جن کے گھروں سے
تہذیب و تمدّن کے لبادے سے نکل کر
انسان نظر آنے لگے جانوروں سے
صیّاد مرے باندھ کے پرمجھ سے کہے ہے
دکھلا تو ذرا اُڑ کے بجز اپنے پروں سے
عزّت جو ملی ہے وہ خیالؔ آج بچا لو
دستار اترنے ہے لگی دیکھو سروں سے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ