میری اردو زباں ہے زبانوں کے بیچ

[ismail ajaz]

قارئین کرام آداب عرض ہیں ایک گیارہ سال پرانا کلام آپ کی محبت و بصارتوں کی نذر
امید ہے پسند آئے گا
عرضِ خدمت ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آدمی بٹ گئے خاندانوں کے بیچ
زندگی گم ہوئی قیدخانوں کے بیچ

اپنی مرضی کی جس نے بھی رکّھی اڑان
منزلیں کھوئیں اس نے اڑانوں کے بیچ

تیر کم پڑ گئے میرے یاروں کے پاس
میں نشانے پہ تھا سب کمانوں کے بیچ

آپ بھی یہ زباں شوق سے بولیے
میری اردو زباں ہے زبانوں کے بیچ

کھیل کیسے کھلانے لگی موت ہے
قتل ہونے لگے ہیں سیانوں کے بیچ

آدمی جانور سا لیے ہے چلن
بھیڑیے ہیں مکیں اب مکانوں کے بیچ

زندگی سہمی سہمی سی ہے ہر طرف
موت ہے گھات میں یوں مچانوں کے بیچ

عیب کیسے کریں ہم کسی کا بیاں
یہ تقابل رہے نکتہ دانوں کے بیچ

ہر طرف خار ہی خار اگنے لگے
ریت ایسی چلی باغبانوں کے بیچ

اس مہذّب سی دنیا میں دیکھو خیالؔ
کچھ کھلونے سجے ہیں دکانوں کے بیچ
۔۔۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبار
اسماعیل اعجاز خیالؔ