خلوصِ دل سے محبت جو کرنے والا ہے

[ismail ajaz]

قارئین کرام آداب عرض ہیں , ایک تازہ کلام پیشِ خدمت ہے امید ہے پسند آئے گا ،اپنی آرا سے نوازیے شکریہ
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تُو قول و فعل سے کیسے مُکرنے والا ہے
کہ جو کیا ہے اُسے تُو ہی بھرنے والا ہے

زمیں پہ فیصلے ہوں گے زمین والوں کے
کیا ہے دعویٰ یہ اس نے جو مرنے والا ہے

کسی کو کوئی نہیں ہے خبر یہاں اپنی
جہانِ فانی سے جو بھی گزرنے والا ہے

بس ایک دم سے دبوچے گی موت ہم سب کو
مفر قضا سے بھلا کون کرنے والا ہے

تم آسماں پہ جسے ڈھونڈتے ہو مدّت سے
وہ چاند اب کے زمیں پر اترنے والا ہے

وہ شخص تم کو بہت یاد آئے گا لوگو
خلوصِ دل سے محبت جو کرنے والا ہے

نہ دیکھو آئینہ اتنا جو تم نہ بدلو گے
کہ تم میں عیب کوئی کب سُدھرنے والا ہے

سمیٹ رکّھا ہے میں نے خیالؔ کو خود میں
جو ریزہ ریزہ کسی پل بِکھرنے والا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ