رہی ناچتی مری زندگی

[ismail ajaz]

قارئین کرام کی خدمت میں سلام عرض ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ایک نظم جو کہ زندگی سے جڑی زندگی کا نچوڑ ملاحظہ فرمائیے ، جسے 2008 میں لکھا تھا پیشِ خدمت ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
زندگی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مرے آئینے میں حجاب تھا
مرا عکس مجھ سے ملا نہیں
مجھے یاد جو رہا دیر تک
وہی شخص مجھ سے ملا نہیں
مری قربتوں میں تھے فاصلے
ترا لمس مجھ سے ملا نہیں
مری ذات میں بڑے عیب تھے
کہیں نقص مجھ سے ملا نہیں
میں قمر کی کھوج میں گم رہا
تُو بھی شمس مجھ سے ملا نہیں
رہی ناچتی مری زندگی
کوئی رقص مجھ سے ملا نہیں
جسے پوجا میں نے تمام عمر
وہی نفس مجھ سے ملا نہیں
میں خیالؔ تنہا رہا سدا
کوئی شخص مجھ سے ملا نہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اب اپ سے کچھ باتیں ہو جائیں
بچے ہمارے عہد کے چالاک ہو گئے
پرانی بات ہے مزے کی سنیے : - اللہ بخشے ہماری بڑی خالہ اور ہماری امـّاں کو ، ہمارے والد کے دنیا سے گزر جانے کے بعد ہم چار بھائی دو بہنیں اور خالہ ذاد پانچ بھائی تین بہنیں کل ملا کر چودہ بچّے ایک ہماری امـّاں ایک بڑی خالہ اور ایک خالو کل ملا کر سترہ افراد کے لئے دستر خوان لگایا جاتا تھا روٹیوں کا ڈھیر ہوتا تھا پکانے والوں کو گھنٹوں محنت کرنی پڑتی تھی اور ضرورت سے زیادہ ہی پکایا جاتا تھا کہ اڑوس پڑوس میں بھی بھیج دیا جائے کوئی ایک آدھ مہمان آگیا تو اس کی خاطر مدارت بھی ہو جائے تو صاحب وہ روٹیوں کا ڈھیر جسے لکڑی اور اُپلوں کی آنچ پر پُھکنی چمٹے بیلن پٹھلے اور دھویں کی مہربانیوں سے پکایا جاتا تھا اور حفظ ماتقدّم کی بنیاد پر روٹیوں کی مطلوبہ تعداد کو ضرورت سے زیادہ رکھا جاتا تھا کہ کہیں کم نہ پڑ جائیں کیوں کہ دوبارہ چولہا جلانا اور روٹی پکانا کسی عذاب سے کم نہیں ہوتا تھا تو ہوتا یوں تھا کہ اکثر روٹی بچ جایا کرتی تھی جسے باوجود تنبیہ و تاکید کے ہم بچّہ پارٹی نہیں کھاتے تھے تازہ پکی ہوئی روٹیاں کھا جایا کرتے تھے اور باسی روٹیاں رہ جاتی تھیں تو ہماری خالہ اور امّـاں حضور ان روٹیوں کو کبھی ضائع نہیں کرتی تھیں ان روٹیوں کو سنبھال لیا کرتی تھیں اور مہینے میں ایک آدھ بار ایسا بھی آتا تھا کہ ان روٹیوں کو بڑے سے بھگونے میں پانی میں گھی ذرا سا اور میٹھا ذرا زیادہ ڈال کر خوب پکایا جاتا تھا اور جب وہ پانی خشک ہو جاتا تو ان روٹیوں کو شاہی ٹکڑے کا نام دے کر ہمیں کھلا دیا جاتا پھر وقت نے انگڑائی لی صبح کے ناشتے میں پراٹھوں کی جگہ ڈبل روٹی نے لے لی ہم بچے ٹوسٹ کے درمیان والے حصے کو تو کھالیتے کنارے چھوڑ دیتے اللہ بھلا کرے ہمارے امّاں اور خالہ کا اور بڑی بہنوں کا کہ وہ ان ٹکڑوں کو بھی ضائع نہیں ہونے دیتی تھیں وہ ان جمع کئے ہوئے ٹکڑوں کو بھی قابلِ استعمال بنا دیتی تھیں دودھ اور میٹھا ملا کر سوئٹ ڈش کا نام دے دیتی تھیں اور ہم مزے لے لے کر بلا چوں چراں کھا لیا کرتے تھے ، اب ہمارے بچـے ہم سے زیادہ ہوشیار ہیں وہ ۴۰ سے ۴۵ روپے کلو ملنے والا آٹا اپنی امّاں سے روٹی کی شکل میں پکواتے ہیں اور اسے نہیں کھاتے وہ روٹیاں پڑی رہتی ہیں خود باہر سے سینڈ وچ برگرز پیزا پاستا مکرونی نوڈلز الم غلم کھا آتے ہیں اور گھر کی روٹیاں بھوسی ٹکڑے والوں کو دے کر چالیس سے پینتالیس روپے کلو میں خریدے گئے آٹے کو بھوسی ٹکڑوں میں تبدیل کر کے دو روپے کا پاپڑ ان سے لیکر کھاتے ہیں اور خوشی سے پھولے نہیں سماتے ہم سے کہتے ہیں کہ بابا دیکھیے ہم نے آپ کا نقصان نہیں ہونے دیا ہم نے ان بھوسی ٹکڑوں کے بدلے چٹ پٹا پاپڑ کھا لیا لیجیے آپ بھی کھائیے بہت مزے کا ہے
کاش ہماری امّاں اور خالہ زندہ ہوتیں وہ ہماری اس تخلیق کو یوں رائیگاں نہ جانے دیتیں ہمارا حوصلہ ہی بڑھا دیتیں اور اس تخلیق کو شاہی ٹکڑے نہ سہی شاعری ٹکڑے کا ہی نام دے کر کسی قابل رہنے دیتیں
آپ سبھی کی دعاؤں کا طلبگار
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اسماعیل اعجاز خیالؔ


یہ پرانی تحریر ہے جب پاکستان میں آٹا ۱۳ روپے تھا آج لگ بھگ ۴۰ سے ۴۵ روپےکا ایک کلوگرام ہے