ترے افسُردہ ہونٹوں پر بڑی دلکش ہنسی ہوگی

[ismail ajaz]

قارئین کرام آداب عرض ہیں ، چار سال پرانا کلام آپ سبھی چاہنے والوں کی نذر . اپنی آرا سے نوازیے شکریہ
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بِنا جل کے کسی بِسمل کی بھی کیا زندگی ہو گی
نہیں جس زندگی میں بندگی شرمندگی ہو گی

بغاوت کرنے والو تم کو آخر کیوں نہیں معلوم
انہی کی ہو گی سر کوبی کہ جن میں سر کَشی ہو گی

جو تم مجھ کو نظر انداز کر کے یوں گزرتے ہو
تمہی بتلاؤ ایسے کس طرح مجھ کو خوشی ہو گی

طمع کی دوڑ میں احساس کی حد سے گزر جانا
خرد مندو ! کوئی کیا اس سے بڑھ کر خودکشی ہو گی

اجالا چاہیے تجھ کو اندھیروں سے نکل باہر
تو جتنا دور ہو گا روشنی سے تیرگی ہو گی

مرے ہی دشمنوں سے تو مراسم جوڑے رکھتا ہے
بتا ایسے میں تیری اور میری دوستی ہو گی ؟

اگر تُو زندگی کی تلخیوں کو بھول جائے گا
ترے افسُردہ ہونٹوں پر بڑی دلکش ہنسی ہوگی

کبھی سورج کی لو سے تُو اندھیروں کا مداوا کر
چراغوں سے خیال آخر کہاں تک روشنی ہو گی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ