اڑان بھرنے کو پھر تولتا وہ پر کیوں ہے

[ismail ajaz]

قارئین کرام ایک۶ فروری ۲۰۲۳ میں لکھا کلام پیشِ خدمت ہے امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔
ذلیل تر ہے اگر جگ میں معتبر کیوں ہے
وہ آدمی ہے تو پھر اتنا جانور کیوں ہے

ہے خواہشات کا اک بیکراں سمندرِ دل
تو اس میں زیست کا کردار مختصر کیوں ہے

جسے ہے سارے زمانے کی آگہی حاصل
خود آگہی میں سدا رہتا بے خبر کیوں ہے

چھڑا سکا نہ کبھی موت سے کوئی پیچھا
تو سوچتا یوں ہر اک موت سے مفر کیوں ہے

ابھی تو ختم ہوا ہے یہ زندگی کا سفر
سفر کے بعد پھر اک دوسرا سفر کیوں ہے

قفص میں قید ہے جب جانتا ہے دل پنچھی
اڑان بھرنے کو پھر تولتا وہ پر کیوں ہے

ادب میں جس کو ملا ہے مقامِ یکتائی
ادب شعار ہے تو پھر بھی کم نظر کیوں ہے

خیالؔ امن کے سفیر آپ ہیں تو پھر
ہر ایک سَمت میں پھیلا ہوا یہ شر کیوں ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ