جیت کی خاطر بنا سب کا نشانہ ہے کوئی

[ismail ajaz]

یہ کلام ۲۰ مئی ۲۰۲۳ میں لکھا گیا تھا
قارئین کرام ایک تازہ کلام پیشِ خدمت ہے ، امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔۔
اڑتے پتّوں کا ہواؤں میں ٹھکانہ ہے کوئی
ہے نہیں پہچان جن کی اور فسانہ ہے کوئی

اک ہدف تنہا تھا جس پر تیر برسائے گئے
جیت کی خاطر بنا سب کا نشانہ ہے کوئی

داستاں سب کی الگ ہے پر کہانی ایک ہے
جس کا افسانہ ہے کوئی اور ترانہ ہے کوئی

سوزِ ماضی کو لیے ہے حال و مستقبل تباہ
واسطے ہم عہدِ نَو کے بھی زمانہ ہے کوئی

آپ نے ملنا نہیں ہم سے نہیں ملیے جناب
آئیں بائیں شائیں کرنا بھی بہانہ ہے کوئی

آپ نےمحفل میں مجھ کو بارہا رُسوا کیا
اس سے بڑھ کر دردِ دل کا تازیانہ ہے کوئی

آپ کی مُسکان دل کو ہے چُرا کر لے گئی
آپ کا اندازِ الفت قاتلانہ ہے کوئی

جو کبھی الفت کے دریا میں نہیں ڈوبا خیالؔ
اُس کا اظہارِ محبت عامیانہ ہے کوئی
۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ