یہ کلام۱۴جولائی ۲۰۲۴ میں لکھا گیا تھا
قارئین کرام ایک تازہ کلام پیشِ خدمت ہے ، امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تقریر کے ہاتھوں کبھی تحریر کے ہاتھوں
رُسوا نہ کرو خود کو یوں تشہیر کے ہاتھوں
چہرے پہ حقارت کی ہنسی تم یوں سجا کر
اظہارِ تکبّر کرو تصویر کے ہاتھوں
گمراہی کی کوئی تو کسر چھوڑتے تم لوگ
ایسے تو سزا پاتے نہ تعزیر کے ہاتھوں
سرسبز ہمیں باغ دکھائے تھے جو تم نے
کیوں ان کا ثمر تُرش ہے تعبیر کے ہاتھوں
اُڑنے کو کہاں جائے قفس میں جو ہُوا قید
بے بس ہے پرندہ یہاں تقدیر کے ہاتھوں
ماتم ہے ہر اک سمت عقیدت میں اَلم کا
ہوتا ہے بدن سوز جو زنجیر کے ہاتھوں
صیاد کبھی چھوڑے کبھی پکڑے پرندہ
ششدر ہے یہاں وقت بھی تدبیر کے ہاتھوں
تم ایسے خیالؔ اپنی غزل ہم کو سُنا کر
مشکوک نظر آتے ہو توقیر کے ہاتھوں
۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ