نظر ملا کے نظر سے گرا کے مارا گیا

[ismail ajaz]

یہ کلام ۲۵ اکتوبر ۲۰۲۴ میں لکھا گیا تھا
قارئین کرام ایک تازہ کلام کے ساتھ حاضرِ خدمت ہوں امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یقین پیار کا جن کو دِلا کے مارا گیا
وفا کی سُولی پر ان کو چڑھا کے مارا گیا

نکل گیا جہاں مطلب تو منہ کو پھیر لیا
پھر اجنبی کی طرح سب بُھلا کے مارا گیا

گواہ رہنا فلک والو ظلم کی شے پر
زمین والوں کو عبرت بنا کے مارا گیا

جو سو رہے تھے کہیں ان کو خوابِ غفلت سے
جگا جگا کے محبت جتا کے مارا گیا

ہمارا قتل ہوا ہم سے دوستی کر کے
نظر ملا کے نظر سے گرا کے مارا گیا

عدو سے ہم کو نہیں کوئی اب گلہ شکوہ
کہ دوستی میں ہمیں گھر بُلا کے مارا گیا

کیا گیا کوئی معذول اپنے عہدے سے
کسی کو منصبِ اعلیٰ پہ لا کے مارا گیا

یہ زندگی ہے نشیب و فراز کا مظہر
خیالؔ درد کو جس میں بسا کے مارا گیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ