خیال دل جو گلاب ہوتا کمال ہوتا

[ismail ajaz]

یہ کلام ۲۹ اگست ۲۰۲۵ میں لکھا گیا تھا

قارئین کرام ایک تازہ کلام پیشِ خدمت ہے ، امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔
تمہارا ہرگز ہمیں نہ کوئی خیال ہوتا
حسین چہرہ کوئی تمہاری مثال ہوتا

نہ دل سے دل تک رسائی ہوتی ہماری لوگو
نہ دل کی دھڑکن سے دل ہمارا نہال ہوتا

نہ ایک دوجے سے زندگی بھر نباہ کرتے
نہ دل سے دل تک محبتوں کا وصال ہوتا

ہم اجنبی بن کے عمر اپنی گزار دیتے
نہ سلسلہ گر ہمارا الفت کی چال ہوتا

ہماری الفت کی داستاں گونجتی فضا میں
ہمارے مابین رابطہ گر بحال ہوتا

گلاب چہرہ گلاب لہجہ گلاب باتیں
خیال دل جو گلاب ہوتا کمال ہوتا

ندی بپھرتی نہ اپنی موجوں کے جوش سے تو
روانیوں میں نہ دریا کی یوں اچھال ہوتا

نہ ہم تمہیں اک خیالؔ بن کر کبھی ستاتے
نہ تم پری وش کا نام پیکرؔ جمال ہوتا
۔۔۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ