ہم نے فضا میں دیپ جلائے اُمِید کے

[ismail ajaz]

قارئین کرام ایک تازہ کلام کے ساتھ خیال کا آداب ، امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔۔
ہم نے دِکھائے کھیل ہیں دورِ جدید کے
ہم نے فضا میں دیپ جلائے اُمِید کے

جیشِ وطن نے توڑ دیے دشمنوں کے دانت
ناکوں چنے چبائے عدو نے حدید کے

دشمن ہلاک ہو گیا جب معرکہ ہُوا
مومن کی جان بھی گئی مثلِ شہید کے

ایمان بیچ دے کوئی دنیا کے واسطے
کوئی لٹائے دنیا کو جنت خرید کے

شامل کٹا کے انگلی شہیدوں میں ہم ہوئے
قربان ہو گئے لیے جذبے مزید کے

لوگوں کی عید ہو گئی جب چاند دِکھ گیا
ہم منتظر رہے ترے چہرے کی دید کے

اُسلُوب شیریں دیجیے الفاظ کو جناب
آداب سیکھ لیجیے گفت و شُنید کے

اب تو خیالؔ سوچیے عقبیٰ کے واسطے
دنیا سے لے کے جائیے جنّت کشید کے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ