بے اعتباری کے رشتے تو مار دیتے ہیں

[ismail ajaz]

قارئین کرام ایک تازہ کلام پیشِ خدمت ہے ، امید ہے پسند آئے گا

عرض کیا ہے

۔۔۔۔۔۔۔۔۔۔۔۔۔۔۔۔۔۔
تمہاری جیت کو ہم اختیار دیتے ہیں
تمہیں جتاتے ہوئے خود کو ہار دیتے ہیں

جو کہتے رہتے ہیں ہم رہ نہیں سکیں گے جدا
وہ اپنی زندگی تنہا گزار دیتے ہیں

ہمارے عیبوں پہ کیوں شکوہ سنج ہے دنیا
جب آئینے ہمیں دل سے سنوار دیتے ہیں

محبتوں میں کہاں کوئی شرط ہوتی ہے
محبتوں میں فقط جان وار دیتے ہیں

ہمیں تمہارے سوا کوئی بھی نہیں جچتا
ہم اپنے دل کو تمہی سے قرار دیتے ہیں

تعلقات کی بنیاد تو بھروسا ہے
بے اعتباری کے رشتے تو مار دیتے ہیں

جو خود سری میں ہر اک حد کو پار کر دیں وہ
زباں کا زہر جگر میں اتار دیتے ہیں

ہم آج بھی تمہیں نفرت سے باز رکھنے کو
تمہاری باتوں کے بدلے میں پیار دیتے ہیں

وہ جھوٹ بول کے لوگوں کا پی رہے ہیں لہو
جنہیں خیالؔ مسیحا قرار دیتے ہیں

۔۔۔۔۔۔۔۔۔۔۔۔۔۔۔۔۔۔

آپ کی توجہ کا طلبگار

اسماعیل اعجاز خیالؔ