Lafz par Ashaar#5--" ZAKHAM"

Post by **najma** » Fri Apr 15, 2005 2:12 am

Murjha gaye haiN phool to taza rahe haiN ZAKHAM
ye baagh tou khaza'n main bhi WiraaaaN nahi hua...

Post by **Hashmat Usmani** » Fri Apr 15, 2005 2:17 am

ham ne 'ilaaj-e-zaKhm-e-dil to DhuuNDh liyaa, lekin
gehre zaKhm ko bahaar aane meN waqt to lagtaa hai

Post by **najma** » Fri Apr 15, 2005 2:21 am

har har qadam pe ji ne diye haiN hazaar zakhm
us fitna-gar ko bhool na jaaoN to kia karooN
najma

Post by **Hashmat Usmani** » Fri Apr 15, 2005 2:25 am

ai naye dost! maiN samjhuuNgaa tujhe bhii apnaa
pahle maazii kaa koii zaKhm to bhar jaane de

Nazeer Baaqrii

Post by **najma** » Fri Apr 15, 2005 2:48 am

kisi ne poocha agar, zakhm kis ne bakhshe haiN
baRe khuloos se tera pata bataa doonga

Post by **Hashmat Usmani** » Fri Apr 15, 2005 3:08 am

kia bhalaa mujhko paraKhne ka natiijaa niklaa
zaKhm-e-dil aap kii nazaroN se bhii gehraa nikalaa

Muzaffar Waarsii

Post by **Hashmat Usmani** » Fri Apr 15, 2005 3:32 am

barasoN yuuN hii dil_jamii-e-aurang kii Khaatir
sau phuul khilaaye kabhii sau zaKhm Khariide
maiN likhtaa rahaa hijv baGhaavat manshuuN kii
maiN paRhtaa rahaa qasr_nashiinoN ke qasiide
ubhraa bhii agar dil meN koii jazba-e-sar_kash
is Khauf se chup thaa k koii hoNTh na sii de

AHmad Faraaz