rog jii kaa buraa nahiiN hotaa...ek qadre puraanii Ghazal

[Hashmat Usmani]

salaam dosto,

aapkii Khidmat meN apnii ek puraanii chhoTi bai'hr kii Ghazal le kar Haazir huaa huuN. ummeed hai ki aapko bhali lagegii. aapkii aaraa ka intezaar rahegaa. shukria.

to Ghazal mulaaHizah farmaaiye:

1.
dard dil se judaa nahiiN hotaa
koii yuN baa_vafaa nahiiN hotaa

2.
baat koii to hai kudoorat kii
ranj be_muddo'aa nahiiN hotaa

3.
yuN mile ho Ghuroor_o_naKhwat se
jaise dil emN Khuda nahiiN hotaa

4.
tum bhii, naaseH!, kahiiN lagaao dil
rog jii kaa buraa nahiiN hotaa

5.
mashwarah dil kaa maan lete haiN
phir bhii dil kaa kahaa nahiiN hotaa

6.
pyaar, "Sai'Hbaa!" se hai k zauq-e-nazar
aaj tak faisala nahiiN hotaa

[najma]

bohat khoob baradaram!
har she,r umdah hay.poorii ghazal pasand aaee.
daad qubool kijiye

[little abbasi]

SALA/\/\.

AAP KE YE GHAZAL PASAND I HAY.

ATTIQ ABBASI

[irfan abid]

Usmani Sb, aadaab!

aap kii Ghazal pasand aayii. daad haazir hai! aap zaraa aur Ghaur farmaate to chand ash.aar bahtar ho sakte the. maslan matla aur maqta kaa mafhuum (kam.az.kam mujh par) vaazah nahiiN huaa.

niyaazmand,
Irfan :Abid: