Page 1 of 1
Aek maAmooli sii Ghazal Abdullah Nazir.
Posted: Thu Aug 04, 2005 4:47 am
by Abdullah Nazir
MuHtaramaat o MuHtarameen
Arbaab-e-meHfil aur aHbab-e-sukhan
Purkhuloos Tasleemaat, :rose
Apni aek taazah seedhi saadah ghazal pesh karrahaa hooN. Ummeed ke aap apni giraaNqadr aaraa se navaazkar khaaksar ko shukriyah adaa karne kaa mauqaA denge.
G H A Z A L roman meiN.
1- Kaifiyyat-e-dil jaanaaN, tum ne nahiN pehchaani
Hulchal hei samundar meiN, her mauj hei Toofaani
2- Dunyaay-e-muHabbat meiN, kis baat kii Hairaani
Tum ko bhii pareshaani, mujhko bhii pareshaani
3- Mastoor hii rehne de, aiy dasht kii veeraani
Izhaar-e-haqeeqat se, houti hei pashemaani
4- lafzaoN meiN bayaaN kyaa hou, paighaam-e-wafaa us kaa
jou kal bhii thaa laacaani, aur aaj bhii laacaani
5- manzil tou hameshah hei, Thoukar meiN musaafir kii
phir gard-e-safar kaisi, aur kaisi tan-aasaani
6- ik shoAbadah-gar ko maiN, kiyuN apnaa samajh baiThaa
afsous ke mujh se bhii, sarzad houie naadaani
7- ik junbish-e-abroo per, qurbaan maiN houjaataa
kab tujh ko yaqeeN aayaa, kab baat miri maani
8- hei Tarz-e-wafaadaari, yaa Husn-e-taAalluq hei
aate hii tire dar per, jhuk jaati hei paishaani
9- ik aayienah-khaane meiN, sao rang kii shakleN heiN
dunyaa tire mele meiN, khalqat houie deewaani
10- Nazir se nah karnaa tum, waAdah kabhi milne kaa
insaaN kaa bharousa kiyaa, insaan tou hei faani
=====
Aapka Mukhlis,
Nazir.
Posted: Fri Aug 05, 2005 9:22 pm
by Sarwar A. Raz
mukarram-e-bandah Naz^ir SaaHeb: aadaab!
aap kee yeh "ma'moolee" Ghazal naz^ar-nawaaz huyee! agar yeh aap kaa :ma'moolee: kalaam hai to ph`ir a'laa darjeh kaa kis ko kehte haiN?
Ghazal kaa andaaz Khoob hai. Khayaal, bayaan, bandish sab hee u'mdah haiN aur aap kee puKhtah-mashqee ke aa,eenah-daar haiN. meree daad qubool keejiYe.
aaj kal :Taar-e-Anfaas-e-Ghazal: zer-e-mut^aali,a'h hai! lut^f aa rahaa hai!
Sarwar A. Raz "SArwar"
Posted: Sat Aug 06, 2005 7:32 am
by PK Swami
Respected Nazir Saheb
aadaab.
kai dinoN baad aanaa huaa. aap kee ghazal paRh kar bohat hee achhaa lagaa. bohat hee dilkash ghazal banee hai. mubaarakbaad haazir hai. sabhee ashaar behatareen haiN.
1- Kaifiyyat-e-dil jaanaaN, tum ne nahiN pehchaani
Hulchal hei samundar meiN, her mauj hei Toofaani
2- Dunyaay-e-muHabbat meiN, kis baat kii Hairaani
Tum ko bhii pareshaani, mujhko bhii pareshaani
3- Mastoor hii rehne de, aiy dasht kii veeraani
Izhaar-e-haqeeqat se, houti hei pashemaani
4- lafzaoN meiN bayaaN kyaa hou, paighaam-e-wafaa us kaa
jou kal bhii thaa laacaani, aur aaj bhii laacaani
5- manzil tou hameshah hei, Thoukar meiN musaafir kii
phir gard-e-safar kaisi, aur kaisi tan-aasaani
6- ik shoAbadah-gar ko maiN, kiyuN apnaa samajh baiThaa
afsous ke mujh se bhii, sarzad houie naadaani
7- ik junbish-e-abroo per, qurbaan maiN houjaataa
kab tujh ko yaqeeN aayaa, kab baat miri maani
kyaa baat hai! waaH !
8- hei Tarz-e-wafaadaari, yaa Husn-e-taAalluq hei
aate hii tire dar per, jhuk jaati hei paishaani
waah waah ! andaaz.e bayaaN kyaa khoob hai!
9- ik aayienah-khaane meiN, sao rang kii shakleN heiN
dunyaa tire mele meiN, khalqat houie deewaani
10- Nazir se nah karnaa tum, waAdah kabhi milne kaa
insaaN kaa bharousa kiyaa, insaan tou hei faani
regards.
P K Swami
Posted: Wed Aug 31, 2005 1:17 pm
by Anmol
Waah waah waah...........bohot hi zabrdast ghazal irshaad farmayi aap ne, Nazir Sahib.