Page 1 of 1
TaraHi Ghazal Guz.8 ke miSreA per: Abdulqayyum Sahil, jeddah
Posted: Mon Aug 22, 2005 11:37 am
by abdulqayyum sahil
Dousto,
Tasleemaat,
Guz.8 ke miSreA per apni TaraHi ghazal pesh karrahaa hooN. Ummeed ke aap sab apni aaraa se navaazenge.
Khair Andesh,
Sahil.
GHAZAL roman meiN
maiN dholooN hath apni zindagi say
tumheiN fursat nahi jalwahgari say
na janey kiya khalish hai roshni say
bujhaye hai diyay ko oRhni say
bakheri bhi nahi haiN shab ne zulfeiN
charag-e-dil jalay haiN sham hi say
ameeri ka labadah oRhta hooN
bachata hooN maiN daman muflisi say
miray hamrah jab se gaamzan ho
munawwar rahguzar hai roshni say
na lijay dil pa guzray hadsay ko
" khaTa hoti hai saheb aadmi say "
muzah-o-Tanz ka aadi nahi hooN
kiya kar guftgu sanjeedgi say
buray din ki khabar laya hai mausam
chalo aaNsoo baha leiNge abhi say
qadam rakhyu na ku-e-jaN sitaN ameiN
karay hai qatl tegh-e-dilbari say
qaymat tak maiN jina chahta hooN
muhaabat ho gayi hai zindagi say
dil -e- nadaN samajhta hi nahi kuchh
parehsaN hooN maiN ahd-e-bebasi say
hai shuhrat char su aiy sahil uski
hum apnay shahr meiN haiN ajnabi say
Posted: Tue Aug 23, 2005 3:45 am
by jawaid badauni
Mohtaramee Sahil Sahab, Aadaab.O.Niyaz
Aapki tarahee Ghazal bahut pasaNd aaii. Har she'r lajawab hai.
Mujhe to aaj pahlee baar aapka kalam paRhne ka ittefaq hoa
hai. Ummid hai aaindaaH bhi apke kalam-e balaghat nizam se
faizyaab hota rahooNga.
Daad.o.tahseen qubool kijiye.
Khulooskaar,
Jawaid Badauni
Posted: Tue Aug 23, 2005 6:37 pm
by gazal_uzma
abdul sahib
bohot khobsorat ghazal hay aap ki
regards
uzma khan
Posted: Thu Aug 25, 2005 10:26 am
by nigaah
Saahil Sahab
aap ki ghazal ke mazaameen pasand aaye .....
maiN dholooN hath apni zindagi say
tumheiN fursat nahi jalwahgari say
wah ....shadeed khafgi ka izhaar hai....:)....
bakheri bhi nahi haiN shab ne zulfeiN
charag-e-dil jalay haiN sham hi say
bohut Khoob.... albatta ek shuba hai...."jalay hai" ya "jalay hain" ??
ameeri ka labadah oRhta hooN
bachata hooN maiN daman muflisi say
aray wah....ye tou bazm ke ek aur bohut achay shaair Irfan Sahab ke shair ka "mirror image" hai...:)...2 mutazaad Khayaalaat...
buray din ki khabar laya hai mausam
chalo aaNsoo baha leiNge abhi say
wah...e andaaz bhi acha hai..
qaymat tak maiN jina chahta hooN
muhaabat ho gayi hai zindagi say
wah ....ye ek aur "mirror image" hai Irfan Sahab hi ke ek shair ka .... aur ye dilchasp baat hai... ke ek hi misra-e-tarah per 2 bilkul ulat Khayaalat baandhay gaye haiN ...
hai shuhrat char su aiy sahil uski
hum apnay shahr meiN haiN ajnabi say
maqtaa bhi pasand aaya....
majmoori tor per aap ki poori Ghazal ek liye daad haazir hai...
Nigaah
shukriya
Posted: Tue Aug 30, 2005 10:30 am
by abdulqayyum sahil
MuHtaramah
Nigaah Saahibah,
Aadaab,
Aapki zarrah navaazi hei ke aap ne meri ghazal kii pazeeraayi kii aur dilkash tabsireh se navaazaa.
JahaB tak Irfan Barabankwi aur meri andaaz-e-fikr meiN kuch tavaarud yaa taZaad is vajah se laaHiq houjaataa hei ke ham aek doosre ko apne apne ashAar telephone se sunaate heiN.
Mazeed aap ne likhkhaa hei:
((charag-e-dil jalay haiN sham hi say ))
Roman meiN "jale" likhnaa chaahiye thaa lekin maiN ne "jalay" likhdiya. Agar aapko yehi baat kuch Ajeeb sii lagi hei, tou bilkul Theek hei. Albattah agar aap ko yeh shubh hei ke "charagh-e-dil bujhe heiN" kii bajaye "charagh-e-dil bujhaa hei" hounaa chaahiye tou Arz karungaa ke is TaraH mufrad lafz ko haalat-e-jamA meiN isteAmaal kiyaa jaasaktaa hei. Micaal ke Taur per Mumin kaa miSraA hei "Khwaab kyaa kyaa nazar aate heiN mujhe". Is Tarah Kii laa-taAdaad micaaleN maujood heiN.
Dobaarah aapki karam farmaayi ke liye beHad shukrguzaar hooN.
Khair Andesh,
SaHil,
Re: TaraHi Ghazal Guz.8 ke miSreA per: Abdulqayyum Sahil, je
Posted: Tue Aug 30, 2005 11:08 am
by Shummu
abdulqayyum sahil wrote:
maiN dholooN hath apni zindagi say
tumheiN fursat nahi jalwahgari say
na janey kiya khalish hai roshni say
bujhaye hai diyay ko oRhni say
miray hamrah jab se gaamzan ho
munawwar rahguzar hai roshni say
muzah-o-Tanz ka aadi nahi hooN
kiya kar guftgu sanjeedgi say
buray din ki khabar laya hai mausam
chalo aaNsoo baha leiNge abhi say
qadam rakhyu na ku-e-jaN sitaN ameiN
karay hai qatl tegh-e-dilbari say
hai shuhrat char su aiy sahil uski
hum apnay shahr meiN haiN ajnabi say
wah bahut khoob ashaar pesh kiye hai aapne...yun to poori ghazal hi pasand aayi magar quoted ashaar zyaada bhaaye.....dili daad aur mubarakbaad pesh hai is umda kalaam pe sahil jee
Adaab,
shumaila
Posted: Tue Aug 30, 2005 11:25 am
by Star Mind
moHtarami A.SaaHil SaaHib, aadaab
janaab aap ki muraSSa' Ghazal bohut pasand aayee ! tamaam asha'aar hi Khoob haiN ! aap ka andaaz bohut pasand aayaa ! DheroN daad qabool kejeye ! shukriya
moKhliS :
Zia Baloch
Posted: Thu Sep 01, 2005 6:08 am
by Ibn-e-siddique
sahil saHib
salaam arz hai
bahot khoob janaab
aap ki ghazal paRh ker lutf aaya, kuch ash'aar khaas taur per pasand aaye. girah bhi khoob lagaai
aik kaamiyaab ghazal per meri jaanib se daad qubool farmaaiN
amjad