Yaaraan-e-bazm,
Aadaab!

Aap sab kii himmat afzaai ke nataaij dekhiye: ek aur ghazal pesh karne kii jurrat kar rahaa hooN.

Aap sabkii khidmat meiN:

khwaab leykar aaye tujhko

khwaab leykar aaye tujhko jab merii aaGhosh meiN
sochtaa hooN, aa sakuuN na phir kabhii maiN hosh meiN

yooN garebaaN thaa to pinhaaN shakl-e-malmal posh meiN
zikr-e-ulfat kar gayaa maiN, haif! aakar josh meiN

tuu nahiiN to yaad terii saath mere thii zaroor
the wajood-e-yaar key ehsaas chashm-o-gosh meiN

Hosh kaa pardah haTaayaa, to dikhaa ek gulsitaaN!
Zeest kaa sab husn hai us manzar-e-mad hosh meiN.

thaa saroor-e-wasl itnaa, khaak hotii guftagoo!
Khair bhii na poochh paayeN us dam-e-khaamosh meiN

yeh nashaa to, aye "Munawwar", mai se bhii chaRhtaa nahiiN!
YooN bahakne kii adaa hai kab kisii mainosh meiN?

-----------------------------------------------------------------------------

YaaroN, merii ghazal kaisii lagii bataa'iega?



Aap sabko Munawwar kaa salaam,
Mukhlis
Bhaswar Dasgupta "Munawwar"

Ahbaab!

Is ghazal ke mutaaliq koii khayaal nahiiN?
koi fikr nahiiN, koii bhi sawaal nahiiN?

Munawwar

Munawwar wrote: khwaab leykar aaye tujhko jab merii aaGhosh meiN
sochtaa hooN, aa sakuuN na phir kabhii maiN hosh meiN

wah wah kya khwaaish hai..kya matla hai

tuu nahiiN to yaad terii saath mere thii zaroor
the wajood-e-yaar key ehsaas chashm-o-gosh meiN

wah wah!bahut khoob kaha...!

Hosh kaa pardah haTaayaa, to dikhaa ek gulsitaaN!
Zeest kaa sab husn hai us manzar-e-mad hosh meiN.

wah wah kya taarefe karna ka andaaz hai..bahut khoob janaab! 8)

thaa saroor-e-wasl itnaa, khaak hotii guftagoo!
Khair bhii na poochh paayeN us dam-e-khaamosh meiN

aaye haaye..kya khoobsurat shikwah hai khud se

[/quote]

han jee ab aap daad qubool karein is pur suroor kalaam pe.....

zor-e-qalam aur ziyaada!

Shumaila