"misr'a lagaaiye"

Post by **Daanish** » Fri Aug 25, 2006 5:39 am

aaiye ek naye silsilay ka aaGhaaz karte haiN. ek ma'aruuf shayr ka ek misr'a diya jayega--uula ya caani-- aur doosra misr'a joR kar shayr ko mukammal kiya jayega. masla" agar koi yeh misr'a pesh kare:

'kaaGhazi hai pairahan har paikar-e-tasweer ka'
hum shayr ki takmeel is taraH se karenge misr'a uula laga kar
"naqsh fariyaadi hai kis ki shoKhi-e-teHreer ka
kaaGhazi hai pairahan har paikar-e-tasweer ka" ....aur phir apni jaanib se ek misr'a pesh karenge taa ke silsila aage baRHay.
arbaab-e-zauq se shirkat ki darKhwaast hai.
lijiye tau is silsilay ka aaGhaaz hua chaahta hai aur Mirza Ghalib ke ek misr'e se is laRi ki bismillah ki jaati hai:

"dil ka kyaa rang karuN Khoon-e-jigar hone tak"

Post by **zmufti** » Fri Aug 25, 2006 8:28 am

aashiqi sabr talab aur tammana be taab
dil ka kyaa rang karuN Khoon-e-jigar hone tak

next

dasht maiN hai mujhe vo aish keh ghar yaad nahiN

Post by **Daanish** » Sun Aug 27, 2006 2:35 am

Zarqa SaHeba,
aadaab
ma'aloom hota hai ke silsila pehle qadam par hi ruk gaya!
shayr mukammal kijiye aur doosra misr'a inaayat farmaaiye....

muKhlis
Daanish

Post by **zmufti** » Sun Aug 27, 2006 8:03 am

kam nahiN vo bhee kharabi maiN, pe wusaat ma'aloom
dasht maiN hai mujhe vo aish keh ghar yaad nahiN

Mirza Ghalib

next

jo dil pe guzarti hai raqam karte rahieN ge

Post by **Shafeeq** » Sun Aug 27, 2006 11:24 am

hum parvarish-e-loh-o-qalam karte range
jo dil pe guzarti hai raqam karte rahieN ge--Faiz

'jo ruke tau koh-e-giraaN thhe hum, jo chale tau jaaN se guzar gaye'

Post by **zmufti** » Sun Aug 27, 2006 11:55 am

'jo ruke tau koh-e-giraaN thhe hum, jo chale tau jaaN se guzar gaye'
rah-e-yaar ham ne qadam qadam tujhe yaadgaar bana diyya

next

bakhsh do gar khata kare koi

Post by **Daanish** » Sun Aug 27, 2006 1:08 pm

ragoN mein dauRte phirne ke hum nahi qayal
jab aankh hi se na Tapkaa tau phir lahuu kya hai

'gor kis dil jalay ki hai yeh falak'

hassan_bashir · Post by **hassan_bashir** » Sun Aug 27, 2006 1:21 pm

Daanish wrote:
'gor kis dil jalay ki hai yeh falak'

gor kis dil-jale kee hai ye falak
sholaa yak subH yaaN se uThataa hai

agla misra:

unko maiKhaane meiN le aao saNvar jaayeN ge

~ Ibrahim Zauq ~

hassan_bashir · Post by **hassan_bashir** » Sun Aug 27, 2006 1:27 pm

sara_j wrote:
fir aaya wo zamaana, jo jahaaN se jaam-e-jam nikle

huii is daur meiN maNsuub mujhase baadaa-ashaamii
phir aayaa vo zamaanaa jo jahaa.N se jaam-e-jam nikale

agla misra vahi:

unko maiKhaane meiN le aao saNvar jaayeN ge

~ Ibrahim Zauq ~

ummassad · Post by **ummassad** » Sun Aug 27, 2006 7:54 pm

zooq jo madersey ke bigdey huvy hain mullaa
UNKO MAIKHANEY MAIN LE AAWO SANWER JAYENGY

yeh aayeney tu hain hyret main dalney keliye

(ahsaan danish)

Post by **Daanish** » Mon Aug 28, 2006 8:23 am

hai sirf hum ko tire Khaal-o-Khad ka andaazah
yeh aayeney tu hain hyret main dalney keliye

agla misr'a--Zauq

'behtar tau hai yahi ke na duniya se dil lagay'

Post by **Daanish** » Tue Aug 29, 2006 12:13 pm

ik lafz-e-moHabbat ka itna hi fasaana hai
simTe tau dil-e-a'ashiq, phailay tau zamaana hai

agla misr'a

'hum tau kal Khwaab-e-adam meiN shab-e-hijraaN honge'--Momin

Post by **PK Swami** » Tue Aug 29, 2006 4:49 pm

ashq aaNkhoN meiN, na dil meiN mere armaaN hoNge
hum tau kal Khwaab-e-adam meiN shab-e-hijraaN honge

aglaa misr'a

zaraa pahle se kah denaa, bataa denaa, jataa denaa -- Nooh Naarvee

Post by **PK Swami** » Sat Sep 09, 2006 4:49 pm

sara_j wrote:
PK Swami wrote:ashq aaNkhoN meiN, na dil meiN mere armaaN hoNge
hum tau kal Khwaab-e-adam meiN shab-e-hijraaN honge

aglaa misr'a

aazaraa pahle se kah denaa, bataa denaa, jataa den -- Nooh Naarvee
Swami ji maine Noor Narvee sahib ka naam pehli baar sun rahi hoon

kabhi unki koi tehreer bhi kisi se nahi suni

net per bhi unka kalaam nahi mila tou ab is shair ko kaise takmeel

karun?? aap hi iska doosra misra likh ker koi aisa misra deejiye jo

kiis ustad shayar ka ho

Sara j sahibaa

Nooh Naarvee agle waqtoN ke baRe naamvar shaair the aur ustaad Daagh Dehalvee ke khaas shagirdoN mein The. He was highly respected by Akbar Allahabadee and was widely acclaimed throuhout India as shair of high order and later had more then 300/400 shagirds in all parts of India. unke 2/3 dewaan bhee manzar.e aam par aaye, one was named Tofaan.e Nooh. Daagh apprecited Nooh very much and said somewhere:

aik se hotaa hai haasil aik ko faiz.e sukhan
maine seekhaa Zauq se,aur mujhse seekhaa Nooh ne _ Daagh

aise kaamil ustaad ke sher par misra laganaa miree qabiliyat ke baahar hai. phir bhee aap ke hukm par aik haqeer koshish kartaa hooN !

agar imkaaN ho roz.e eid aamad miree mayyat par
zaraa pahle se kah denaa, bataa denaa, jataa dena !

vaise Nooh sahab ke sher ke mutaabiq ye sher yooN hai:

bigaR kar daf.atan koi sitam mujh par na Dhaa denaa
zaraa pahle se kah denaa, bataa denaa, jataa dena !

kuchh aur sher pesh haiN !

muhabbat kee muhabbat hai, ebaadat kee ebaadat hai
jahaaN jalwaa kisi kaa dekh lenaa, sar jhukaa denaa

hameN barbaad kar denaa tumharee dillagee ThaHree
hamaraa khel ThaHraa, khaak meiN dil ko milaa denaa

fanaa ke baad tum maatam karo ye kyaa zaroorat hai
mere gham ko bhee, mere saaTh miTTi meiN milaa denaa

vo yooN sunte naheeN ai Nooh to kyaa tumko mushkil hai
ghazal ke naam se hee maajraa.e gham sunaa denaa.

Sara-j-saahibaa aap se darkhwasht hai k aglaa misraa aap hee deN to beHtar hai !

regards.

PK Swami

Post by **Daanish** » Tue Sep 12, 2006 2:55 am

Swami SaHeb, Sara SaHeba aur digar ahbaab
ji haaN, hum apne taur par misr'a lagaa sakte haiN aur shayr mukammal kar sakte haiN lekin yeh har kisi ke bas ki baat nahiN hai. ho saktaa hai ke ba'az ahbaab ke liye yeh ek mushkil amal ho....yuN kar sakte haiN, hum is mua'mle meiN 'flexible' ho sakte haiN....ya'ni koi apne taur par misr'a lagaana chaahe tau shauq se kareN; aur koi shayr ki mukammal shakl (original) saheeh taur par pesh kareN tau bhi Thheek! dekhiye kya farmaate haiN ulema-o-asaatezah-o-asHaab-e-ilm-o-fan-o-hunar!

aap ka ataakardah misr'a pesh hai:

aaye hain phir voh azm-e-dil o jaan kiye hue......