abh~ee th~oRee der qabl yeh Ghazal hoee hai. socha baGharaZ^-e-mulaHiZ^aat pesh kar dooN.
beHr-e-ramal meHz^oof=2122....2122....2122.....212
1,
hastee-e-maohoom kaef-e-dao jahaaN kuch~ bh~ee naheeN
juz tire rangeenee-e-bazm-e-jahaaN kuch~ bh~ee naheeN!
2,
apnee na kamee ka mujh~ par kh~ul geya sirr-e-nihaaN
is jahaaN meN HaSil-e-u'mr-e-rawaaN kuch~ bh~ee naheeN!
3,
a'zm rasikh hai to manzil khud pukare gee tujh~e
rah kee talkhee shikastah jism-o-jaaN kuch~ bh~ee naheeN!
4,
fitnah-e-Ghurbat yeh kaese des meN laya jahaaN
koee hamdam, mehrbaaN, na mehrbaaN kuch~ bh~ee naheeN!
5,
aek aesee aag khakistar mujh~e kartee rahee
dil jalatee hai magar jis ka dh~uwaaN kuch~ bh~ee naheeN!
6,
jaan le meree taRap se shiddat-e-dard-o-alam
warnah mujh~ nakhcheer-e-bismil kee zabaaN kuch~ bh~ee naheeN!
7,
ab mujh~e aazad kar ke kiya mila Siyyaad ko?
jab naz^ar ke samne kaon-o-makaaN kuch~ bh~ee naheeN!
8,
Doob kar saHil peh ham ne raz yeh jana to kiya!!
bar lab-e-saHil hai t^ufaaN darmiYaaN kuch~ bh~ee naheeN!
9,
is qadar is taodah-e-hastee peh tu nazaaN nah ho
khaak ke putle se baRh~ kar jis-o-jaaN kuch~ bh~ee naheeN!
10,
maiN tire kuche se uTh~ kar kiya geya keh ab wahaaN
koee sae,il hai nah raqS-e-neem jaaN kuch~ bh~ee naheeN!
( sae,il=sawaal karne wala)
11,
she'er kehne hooN to Nazir* se liya kar mashware
Sirf teree shaokhee-e-Husn-e-bayaaN kuch~ bh~ee naheeN
(*moHtaram Abdullah Nazir)
12,
dekh~ kar Halat Muz^affar kee raHam aaya mujh~e
maiN pukaar uTTh~a mira dard-e-nihaaN kuch~ bh~ee naheeN.
zeYadah Hadd-e-adab!
Muz^affar A Muz^affar[/align]
