Maah July ke muntakhab shayar.........Abbas Dana

[Hashmat Usmani]

apne KhaaboN meN tujhe jis ne bhii dekhaa hogaa


apne KhaaboN meN tujhe jis ne bhii dekhaa hogaa
aaNkh khulte hii tujhe DhuunDhne niklaa hogaa

zindagii sirf tere naam se mansuub rahe
jaane kitne hii dimaaGhoN ne ye sochaa hogaa

dost! ham us ko hii paiGhaam-e-karam samjheNge
terii furqat kaa jo jaltaa huaa lamHaa hogaa

daaman-e-ziist meN ab kuchh bhii nahiiN hai baaqii
maut aaii to yaqiinan use dhokaa hogaa

raushnii jis se utar aaii laHuu meN mere
ai masiiHaa! vo miraa zaKhm-e-tamannaa hogaa