jise apna muqaddar likh rahaa hooN

[Khurshidul Hasan Naiyer]

aHbaa-e-bazm

salaam-o-raHmah

ek Ghazal pesh hai

jise apnaa muqaddar likh rahaa hooN
use hee sab se kamtar likh rahaa hooN

pyaasa hooN magar unke laboN par
samuNdar hee samuNdar likh rahaa hooN

zameen achhee,na paanee hai na mosam
shajar lekin tanaa war likh rahaa hooN

hai zakhme jaan-o-dil jiskee i'naayat
kahaaN usko sitamgar likh rahha hooN

bahak jaayeN na zahid ke qadam bhee
maiN saaqee jaam-o-saaGhar likh rahaa hooN

saNbaalo chashm-e-dil apne sanbhaalo
maiN dard-e-dil mukarrar likh rahaa hooN

khilaa kar SeHn-e-dil meiN pyaar ke gul
rag-e-jaaN ko mu't^t^ar likh rahaan hooN

suno aye sheesh maHloN ke makinoN
guloN par ab maiN patthar likh rahaa hooN

huwaa jataa hai warq-e-dil munawwar
ab unkaa(SAW) zikr-e-anwar likh rahaa hooN

bayaaN karke i'naayat dostoN kee
sukhanwar khud ko :Naiyer: likh rahaa hooN

khurshidul H. Naiyer