کسی کو جانے کا ارمان بھی نہیں ہوتا
Posted: Thu Aug 13, 2020 8:52 am
قارئین کرام آداب عرض ہیں , جناب راحت اندوری صاحب کے رحلت فرمانے پر ان کی یاد میں ایک تازہ کلام پیشِ خدمت ہے
عرض کیا ہے
۔۔۔۔۔۔۔۔۔۔۔۔۔۔۔۔۔
کسی کو جانے کا ارمان بھی نہیں ہوتا
سفر بھی ہوتا ہے سامان بھی نہیں ہوتا
وہ شخص چھوڑ کے جاتا ہے سوگوار اکثر
کہ جس کے جانے کا امکان بھی نہیں ہوتا
ہم اپنے آپ سے کھا جاتے ہیں شکست آخر
یوں خود سے لڑنا تو آسان بھی نہیں ہوتا
کوئی ہماری کمی پوری کر نہیں سکتا
ہمارے بعد پریشان بھی نہیں ہوتا
ہماری زندگی پل پل اک آزمائش ہے
ہے جس سے بچنا کچھ آسان بھی نہیں ہوتا
ہمارے بدلے کوئی بھی کہیں نہیں مرتا
ہمارے بدلے میں قربان بھی نہیں ہوتا
سپردِ خاک کسی کو تُو کر کےآتا ہے
تو انتقال پہ حیران بھی نہیں ہوتا
خیالؔ زندگی جائے تو جائے ہر راحتؔ
کہ جس کے جانے کا وجدان بھی نہیں ہوتا
۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ