تمام عمر کتابوں کا بوجھ ڈھوتے رہے
Posted: Tue Oct 27, 2020 5:30 am
قارئین کی ِخدمت میں خیال کا آداب ایک سال پرانا کلام پیشِ خدمت ہے امید ہے پسند آئے گا اپنی آرا سے نوازیے شکریہ
عرض کیا ہے
۔۔۔۔۔۔۔۔۔۔۔۔۔۔۔۔۔
لبوں سے ان کے جھڑے موتی ہم پروتے رہے
کلیجہ چھلنی ہوا زخم دل میں ہوتے رہے
تمام عمر کتابوں کا بوجھ ڈھوتے رہے
جب اہلِ علم بھی اپنا شعور کھوتے رہے
ہیں کیسے لوگ محبت بھرے چمن والے
گلاب بو نہ سکے تو بَبُول بوتے رہے
ہمارے دوستوں نے ہم سے جب نظر پھیری
تو زہر لہجوں کے نِشتر ہمیں چبھوتے رہے
ہماری سادگی سے سب نے استفادہ کیا
غرض میں دوست بھی مطلب پرست ہوتے رہے
منافقت کی وہ مسند پہ چڑھ کے بیٹھے ہیں
جو مومنوں کی صفت میں مقام کھوتے رہے
جنہیں ہماری حفاظت پہ تھا کیا مامور
انہی کے ہاتھوں یہاں روز قتل ہوتے رہے
اُنہی نے لوٹا ہے تم کو تمام عمر یہاں
کہ جن سے لپٹے ہوئے تم تھے خوب روتے رہے
خیالؔ آپ سے سب نےعداوتیں رکھیں
اور آپ دل میں محبت ہی بس سموتے رہے
۔۔۔۔۔۔۔۔۔۔۔۔۔۔۔۔۔۔۔
آپکی توجہ کا طلبگار
اسماعیل اعجاز خیالؔ