ہم سے عزّت نہ سنبھالی جائے

[ismail ajaz]

قارئین کرام آداب عرض ہیں , دو سال پرانا کلام پیشِ خدمت ہے امید ہے پسند آئے گا ،اپنی آرا سے نوازیے شکریہ
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔
بات سے بات نکالی جائے
بحث بے ربط بڑھا لی جائے
مل کے سب لوگ جئیں آپس میں
یوں تو عزّت نہ اچھالی جائے
مصلحت دوستی بھائی چارہ
بیچ کی راہ نکالی جائے
کیوں نہ اظہارِ محبت کر کے
دوری مابین گھٹا لی جائے
یار نے جان ہماری مانگی
یار کی بات نہ ٹالی جائے
جو مسیحا ہے وہی ہے قاتل
اس سے ہرگز نہ دوا لی جائے
سر سے دستار ہے گرنے والی
ہم سے عزّت نہ سنبھالی جائے
لے کے کشکول کھڑا ہے خودار
خالی در سے نہ سوالی جائے
آئینہ سامنے رکّھا ہے مگر
دیکھ کر آنکھ چُرا لی جائے
زندگی روپ بدل جائے گی
ایک تصویر بنا لی جائے
تیرگی روشنی کھا جائے تو
پھر کوئی شمع جلا لی جائے
آپ تو حد سے گزر جاتے ہیں
آپ سے جان چھڑا لی جائے
کوئی مقصد تو ہو جینے کا خیالؔ
کیوں عبث عمر گنوا لی جائے
۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ