بندر ماموں
س ی ا س ت سے امارا کوئی تلّک نئیں ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
صاحب ایک بیوہ بکری بڑی ہنسی خوشی اپنے چھوٹے سے میمنے کے ساتھ بڑی آسودہ زندگی گزار رہی تھی کہ ایک دن اس کی پُر امن زندگی میں بھونچال آ گیا اسکی دنیا ہی تباہ و برباد ہوگئی وہی ہوا جو ہمیشہ سے ہوتا چلا آرہا ہے ایک طاقتور نے اپنی طاقت کے جوہر دکھائے ایک مظلوم بیوہ بکری کا میمنا ماں سے چھین لیا گیا ،سارے جانور بیل گدھے گھوڑے ہاتھی گینڈے لگڑ بھگے کرائے کے ٹٹُو سبھی دیکھتے رہ گئے کسی کو اتنی توفیق نہ ہوئی کہ دو ہمدردی کے بول ہی بول دیتا سب اپنی دنیا میں مست اپنا ہرا ہرا چرنے میں مگن ،ایسے میں بیوہ بکری کہاں جائے کس کا دروازہ کھٹکھٹائے کسے پکارے کسے اپنا سمجھے کس سے فریاد کرے ہر ایک چپ سادھے زبان کو تالا لگائے بےحس بنا دکھائی دے لہٰذا بیوہ بکری روتی پیٹتی بندر کے پاس پہنچی اور بولی ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ بندر ماموں بندر ماموں میری گڑیا میری لاڈلی کوئی ظالم اٹھا کر لے گیا میری مدد کرو بندر بولا بکری بھانجھی تم گھبراؤ نہیں گھر جاؤ میں کچھ کرتا ہوں ۔۔۔۔۔۔۔۔۔وہ بھاگ کے ایک پیڑ پر چڑھا وہاں سے چھلانگ لگا کر دوسرے پر پہنچا اس سے نیچے کودا اور الٹی قلابازی کھاتا ہوا تیسرے پیڑ پر چڑھا عجیب و غریب آوازیں نکالیں ایک شاخ سے دوسری شاخ پر جھولا ادھر دیکھا ادھر دیکھا اور اسی طرح اچھل کود میں دن گزار دیا ،دوسرے دن الگ صبح بکری دوڑی دوڑی بیقرار بندر کے پاس پہنچی اور بڑی امّید سے اپنے بچے کے بارے میں پوچھا بندر نے پھر تسلّی دی اور کہا کل آنا یوں تاریخ پہ تاریخ ، تاریخ پہ تاریخ کئی دن بندر کی اچھل کود اور بکری کے آسرے اور امّید بھرے چکّر لگتے رہے بالآخر بکری رونے لگی تو بندر بولا بکری بھانجھی اب تو تم صبر کر لو دیکھ لو کتنی بھاگ دوڑ کی کتنی کوشش کی مگر کوئی سراغ ابھی تک ملا نہیں
۔۔۔۔۔۔
کوئی بتاؤ کہ ہم کیا بتائیں سوائے اس کے کہ
عرض خدمت ہے
..........
سپنا دِکھا دیا ہم کو
اور پھر جگا دیا ہم کو
اچھے بھلے تو سوئے تھے
تم نے اُٹھا دیا ہم کو
ہم نے تمہیں پکارا جب
ٹھینگا دِکھا دیا ہم کو
مطلب نکال کر سارے
ماموں بنا دیا ہم کو
ہم نے تمہیں چُنا لیڈر
تم نے رُلا دیا ہم کو
الفت خلوص سب پا کر
بدلے میں کیا دیا ہم کو
بیٹھے تھے ہم بھی محفل میں
تم نے بھگا دیا ہم کو
ہم سے ہوا بڑا دھوکہ
پاگل بنا دیا ہم کو
ہر ایک نے ہمیں لوٹا
سب نے دغا دیا ہم کو
کس سے کریں گلہ شکوہ
کیوں آسرا دیا ہم کو
تم نے کچھ ایسا الجھایا
سب کچھ بُھلا دیا ہم کو
کب تک خیالؔ سمجھیں گے
دھوکا سدا دیا ہم کو
.............
طالب نظر
اسماعیل اعجاز خیالؔ