ہمارے پیار کا بےباک بانکپن دیکھو

[ismail ajaz]

قارئین کرام آداب عرض ہیں چار پرانا کلام پیش خدمت ہے امید ہے پسند آئے گا اپنی آرا سے نوازیے
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بدلنے والے زمانے کا اب چلن دیکھو
لباس میں ہے بدن بے لباس تن دیکھو

اب اور پاس نہیں آؤ ڈر سا لگتا ہے
نہ مار ڈالے تمھاری ہمیں چُھوَن دیکھو

زمین و آسماں ملتے ہیں بھول کر شکوے
خطا ہماری بھلا دو اگر ملن دیکھو

بس اور نغمہ تمھارا نہیں سنا جائے
تم اب اڑان بھرو دوسرا چمن دیکھو

سب ایک ایک اگر کر کے چھوڑ جائیں گے
رہو گے تنہا کھڑے لے کے انجمن دیکھو

ہمیں فصیلِ محبت میں آج چُنوا دو
ہمارے پیار کا بےباک بانکپن دیکھو

اٹوٹ رشتہ ہے کانٹے ، گلاب کا پل پل
گلاب چاہو تو مت خار کی چُبھن دیکھو

سخن وری میں تمھاری ہے کج ادائی بہت
خلوص پیار محبت میں ہے جلن دیکھو

خیالؔ تم سے شکایت بہت ہے لوگوں کو
تمھارا لہجہ لیے رہتا ہے اگن دیکھو
۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ