گوشِ گزار کرنے کو کوئی صدا نہیں

[ismail ajaz]

قارئین کی خدمت میں آداب عرض ہیں ، ایک سال پرانا کلام پیشِ خدمت ہے امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔۔
بندے خدا کے تجھ پہ یہ عقدہ کُھلا نہیں
اللہ کے سوا کوئی مشکل کشا نہیں

تہذیب نے ہے شرم کی چادر اتار دی
عریاں بدن کی کوکھ میں پلتی حیا نہیں

چہرے کو جھوٹ کے پسِ پردہ چھپا لیا
نظروں کے زاویوں سے کوئی کیوں چھپا نہیں

خاموشیوں نے اپنا گلا گھونٹنا ہی تھا
گوشِ گزار کرنے کو کوئی صدا نہیں

اک دوسرے کے پیچھے چلیں لوگ بھیڑ چال
کیوں میرِ کارواں کوئی رہبر ہوا نہیں

انسان یوں درندہ صفَت بن چکا ہے آج
بس وہ جیے تو کوئی جیے دوسرا نہیں

لفظوں کے تیر آپ برابر چلائیے
لب پر ہمارے کوئی بھی شکوہ گلہ نہیں

اب صاحبِ ادب بھی لکھیں ھے سے ہے خیالؔ
اردو ادب میں ھے سے کہیں ابتدا نہیں
۔۔۔۔۔۔۔۔۔۔۔۔۔۔۔۔۔۔۔
توجہ کا طلبگار
اسماعیل اعجاز خیالؔ