مرے خُدا کوئی ایسا کمال دے مجھ کو
Posted: Sat Mar 05, 2022 8:26 am
قارئین کرام ایک تازہ کلام پیشِ خدمت ہے ، امید ہے پسند آئے گا
عرض کیا ہے
۔۔۔۔۔۔۔۔۔
ملوں میں جس سے محبت جمال دے مجھ کو
دعا ہے رب سے حمیدہ خصال دے مجھ کو
میں نفرتوں کے عِوَض جگ میں الفتیں بانٹوں
کوئی تو آ کے محبت میں ڈھال دے مجھ کو
اُڑان بھر کے میں خود آسمان چھو لوں گا
زمیں کی پستی سے کوئی نکال دے مجھ کو
یہ کائنات مری دسترس میں ہو شامل
مرے خُدا کوئی ایسا کمال دے مجھ کو
میں زندگی تجھے اپنے عروج پر لاؤں
حیات پھر سے اگر ماہ و سال دے مجھ کو
میں غفلتوں کے سمندر میں ڈوبا رہتا ہوں
شعورِ زیست ذرا تُو اچھال دے مجھ کو
میں تیرگی میں بھی منزل کی راہ تک پہنچوں
مرے نصیب تُو خود سے اجال دے مجھ کو
ہو کائنات کے رنگوں میں میری بھی تصویر
جو زندگی کوئی دلکش خیالؔ دے مجھ کو
۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ