کسی کے کام جو آئے وہ زندگی کر دو

[ismail ajaz]

قارئین کرام آداب عرض ہیں 2 ستمبر 2022 کو لکھا کلام پیش خدمت ہے امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔
ہمیشہ کے لیے تم ختم دشمنی کر دو
کہ تلخ لہجے میں شامل جو شیرنی کر دو

تمہارے زیرِ اثر جو نہ بن سکا انساں
تم اس درندے کو حیواں سے آدمی کر دو

ہے اپنی ذات سے دنیا کو کیا دیا تم نے
کسی کے کام جو آئے وہ زندگی کر دو

ہر ایک چاہے جسے کرنا زیست میں شامل
تم اپنی ذات کو چاہت بھری خوشی کر دو

بہت اندھیرا ہے نفرت کا اب تو ہر جانب
محبتوں کی ذرا دل میں روشنی کر دو

کرو خدا سے محبت کچھ اس طرح لوگو
فقط خدا سے ہی منسوب بندگی کر دو

ہے اس جہان سے جانے کا وقت آ پہنچا
خدارا اب توعداوت میں کچھ کمی کر دو

بہا کے لے گیا پانی خدا کی بستی کو
نہ شہر والو خبر سن کے ان سُنی کر دو

ہماری تم سے نہیں دیکھی جائے خوشحالی
اسی بہانے چلو ہم سے بے رخی کر دو

خیالؔ جو بھی کہا تم نے سن لیا سب نے
اب اپنی بات سے پھر جاؤ ان کہی کر دو

۔۔۔۔۔۔۔۔۔۔۔۔۔۔۔۔
آپ کی توجہ کا طلبگار

اسماعیل اعجاز خیال