محبتوں کی تھی کبھی جو گفتگو نہیں رہی

[ismail ajaz]

قارئین کرام ایک۲۶ فروری ۲۰۲۳ میں لکھا کلام پیشِ خدمت ہے امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔
محبتوں کی تھی کبھی جو گفتگو نہیں رہی
کہ ہم میں پیار کی رمق بھی دُو بدُو نہیں رہی

طلب کا خون ہو گیا تو آرزو بھی مٹ گئی
ہم اپنی موت مر گئے جو جستجو نہیں رہی

کسی سے کیا لڑیں گے وہ جو خود سے لڑ نہیں سکے
اب اُن کو جیت ہار کی بھی آرزو نہیں رہی

سنوارتے ہیں صبح و شام اپنی مسخ شکل ہم
بگڑ گئی ہے رات دن جو خوب رُو نہیں رہی

ہر ایک سَمت بج رہا ہے طنطنہ فریب کا
اور اُس پہ حالتِ امم بھی سُرخُرو نہیں رہی

نشے میں چُور نامراد بے شعور بے نیاز
ہماری قدر و منزلت کی آبرو نہیں رہی

تھا جس کا منہ جدھر اُدھر روانہ ہو گیا کہیں
کہ رُشد کی جو روشنی تھی پیش رُو نہیں رہی

فلک پہ اَوج کی اُڑان بھر رہا تھا آدمی
گرا جو پستیوں میں ساکھ کُو بہ کُو نہیں رہی

خیالؔ آپ کس قدر بدل گئے ہیں آج کل
وہ تازگی وہ چاشنی شگفتہ رُو نہیں رہی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ