محبت سیکھ لو جھرنوں کی جھَر جھَر گنگناہٹ سے

[ismail ajaz]

یہ کلام ۱۵ جون ۲۰۲۳ میں لکھا گیا تھا
قارئین کرام ایک تازہ کلام پیشِ خدمت ہے ، امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔
قفس میں قید پنچھی کی مسلسل پھڑپھڑاہٹ سے
ہُوا صیّاد کیوں خائف ہوا کی سرسراہٹ سے

پرندہ کہہ رہا ہے چھوڑ دو مجھ کو رہا کر دو
دُہائی دے رہا ہے ہر طرف وہ بوکھلاہٹ سے

کوئی سرگوشیاں کرتا ہے آ کر میرے کانوں میں
محبت سیکھ لو جھرنوں کی جھَر جھَر گنگناہٹ سے

محبت کا کرو اظہار دل کی بات کہہ ڈالو
وفا کے پھول جھڑنے دو لبوں کی تھرتھراہٹ سے

ہمیں اپنا بنا لو اور ہم سے دل لگا لے تُم
تکلف بر طرف رکھ کر کسی بھی ہچکچاہٹ سے

میں ساری زندگی قربان کر دوں تیرے اس پل پر
کہ جب تُو دل چُراتا ہے حسیں اک مسکراہٹ سے

رویہ کس قدر تیرا بدل جاتا ہے اک پل میں
محبت بھول جاتا ہے ذرا سی کسمساہٹ سے

خیالؔ اتنا نہیں تُو بول سب ناراض ہوتے ہیں
کوئی بھی خوش نہیں ہوتا ہے تیری چلبلاہٹ سے
۔۔۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ‎