جو فرصت ملے آئینہ دیکھیے

[ismail ajaz]

یہ کلام ۵جولائی ۲۰۲۳ میں لکھا گیا تھا
قارئین کرام آداب عرض ہیں ، ایک تازہ کلام آپ سب کی نذر ، امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
محبت کی جب انتہا دیکھیے
تو اس میں خلوص اور وفا دیکھیے

کہانی نے پھر ایک انگڑائی لی
بدلتا ہے رُخ کون سا دیکھیے

محبت میں ہم نے ہے کی انتہا
تو نفرت کی بھی انتہا دیکھیے

نہ بدلی اگر آپ کی زندگی
تو بدلا ہُوا راستہ دیکھیے

ہمیں دیکھنا ہے پرانا وہ خواب
مگر دوسرا رہنما دیکھیے

بھروسا نہیں آپ پر اب ہمیں
بجز اس کے اب اور کیا دیکھیے

سدا سے محبت کے مارے ہیں ہم
ہمیں نفرتوں سے جدا دیکھیے

خفا آپ ہم سے ہوئے ہیں تو کیا
نہ ہوں گے کبھی ہم خفا دیکھیے

بہت مختلف ہو گئے ہیں جناب
جو فرصت ملے آئینہ دیکھیے

وہ پہلے کے جیسے نہیں ہم رہے
جو رکھتے ہیں کچھ فاصلہ دیکھیے

لُٹا دیں گے ہم آپ پر اپنی جاں
یقیں کیجیے آزما دیکھیے

خیالؔ آپ محفل میں کیا آ گئے
سبھی ہو رہے ہیں فدا دیکھیے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ