سانپ پر اعتبار آپ نے کیوں کیا
Posted: Wed Nov 27, 2024 9:29 pm
یہ کلام ۱۷ اکتوبر ۲۰۲۳ میں لکھا گیا تھا
قارئین کرام ایک تازہ کلا کے ساتھ خیالؔ کا آداب ، امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔
اس قدر انتظار آپ نے کیوں کیا
عمر بھر ہم سے پیار آپ نے کیوں کیا
راستے میں اگر سب نے چھوڑا ہمیں
اپنی جاں کو نثار آپ نے کیوں کیا
وقت کا اژدھا یوں نگل جائے گا
سانپ پر اعتبار آپ نے کیوں کیا
جس کو منزل سے دور راستہ لے گیا
وہ سفر اختیار آپ نے کیوں کیا
آپ پر اب نہیں ہے بھروسہ ہمیں
دھوکہ یوں بار بار آپ نے کیوں کیا
کیوں دکھائے ہمیں آپ نے سبز باغ
اور ہمیں پربہار آپ نے کیوں کیا
گھاؤ دل کے اگر بھر رہے تھے سبھی
دل کو پھر اشکبار آپ نے کیوں کیا
زندگی مطمئن تھی خیالؔ آپ کی
تو اسے بے قرار آپ نے کیوں کیا
۔۔۔۔۔۔۔۔۔۔۔۔۔۔۔۔۔۔۔۔
توجہ کا طلبگار
اسماعیل اعجاز خیالؔ