اردو بندھن کے ۳۰ویں مشاعرے میں خیال

[ismail ajaz]

قارئین کرام اردو بندھن کے ۳۰ویں مشاعرے میں خیال پیش خدمت ہے امید ہے پسند آئے گا

عرض کیا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
برستی آگ ہے جب آسماں سے
زمیں تاوان دے آہ و فغاں سے

وہاں کوئی نہ ٹِک پائے اماں سے
محبت کوچ کر جائے جہاں سے

اسے ہے آزمائش سے گزرنا
کرے نفرت بیاں جو بھی زباں سے

محبت میں بھی نفرت کا گماں ہے
خُدا محفوظ رکھے اس گماں سے

نہیں پھولوں کو کھلنے کی اجازت
کہ ہے گلچیں کو نفرت گلستاں سے

سنو تم بھی ہماری داستاں اب
بہت دلچسپ ہے ہر داستاں سے

ہماری زندگی صحرا میں گزری
نہیں ہم کوغَرَض سود و زیاں سے

خیالؔ آپس میں بھائی لڑ رہے ہیں
بھروسا اٹھ گیا ہے اس جہاں سے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آپکی توجہ کا طلبگار

اسماعیل اعجاز خیالؔ