ye nukta vafaa meiN baRe ghaur kaa hai... Himayat Ali Shair

[PK Swami]

Yaraane mehfil
aadaab.

Sulemaan Areeb kee pichhlee peshkarda ghazal ke hawaale se Naazir Sahib ne dilchasp maloomaat faraaham kee thee. Himayat Ali Saheb kaa bhee zikr kiyaa thaa. Naazir sahib se iltijaa hai k unse mutaaliq mehfil ko kuchh aagaah kareN. Himayat Ali Sahib kee aik ghazal pesh kartaa hooN. ummed hai aap ko pasand aayegee !!

takhattub hai tujhse, khayaal aur kaa hai
ye nukta vafaa meiN baRe ghaur kaa hai

vo khilwat meiN kuchh aur jalwat meiN kuchh hai
karam uskaa mujh par, ajab taur kaa hai

meraa cheHraa bhee, meraa cheHraa naheeN hai
ye eHsaan mujh par, mere daur kaa hai

ye nafraT- muhabbat kaa radde amal hai
k mujh se taqaazaa, tere jor kaa hai

naye daur kee ibtidaa kaa hai zaamin
k dil aaienaa gosha.e zor kaa hai

Karachi meiN bhee moTbar ho rahaa hai
sukhan meiN jo andaaz Lahore kaa hai


regards
PK Swami