ghazal zakhm e ulfat zeenat e dil hai zara samjha karo

[khozema husaini]

haazreen e mehfil

asalam alaikum
aap ki KHidmat men ghazal pesh hai aap ki aara ka muntazir rahoonga
shukriyah
Husaini

ghazal

zakhm e ulfat zeenat e dil hai zara samjha karo
jaan e man yeh ishq ka hai falsafah samjha karo

tum ko ruswa kar nah de yuN sab se hansna bolana
ja chuka bachpan zara achchha bura samjha karo

lab kushaai men hamari aapki touheen hai
waqifulasraar ho to mudduAa samjha karo

khelna dil se hamre ik tamasha to nahiN
lag bhi sakti hai kisi ki badduAa samjha karo

rind o zaahid aa gaye is moR tak to saath saath
ab badal jayega inka raastah samjha karo

lag nah jaye daaGH koi daman e bedaaGH par
qurb meN achchha hai thoRa faaSlah samjha karo

giryah e shaam o sahar ke saikRoN asbaab heN
kyuN bahate hen yeh durr e bebaha samjha karo

KHouf e ruswaai se lab par lag gaii mohr e sukoot tum nigaah e shoq ki har ilteja samjha karo

qadr hojati hai kam milne se aise baar baar
aur us par zhar hai shikwah gilah samjha karo

yeh takabbur aur itna zaAm aaKHir kisliye
hai bohat kamzor nafsi silsilah samjha karo

likh rahe ho kyuN Husaini is qadar GHazleN Tweel
zabT e qaari ki hai koi inteha samjha karo

[Mahtab Qadr]

wah wah bahut khoob
apni ghazleiN mahfiloN mai rooz hi bhaija karo
khoobsurat hai bahut ye silsilaa samjha karo

[Abdullah Nazir]

MuHtarami o Azeezi
Khozema Husaini SaaHib,

PurkhulooS Tasleemaat,

Aapki ghazal bahut pasand aayi jiske liye meri dili daad aur mubaarakbaad qubool farmaayiye.

MULAAHIZAAT:

zakhm e ulfat zeenat e dil hai zara samjha karo
jaan e man yeh ishq ka hai falsafah samjha karo

achchaa maTlaA hei, waah waah.

tum ko ruswa kar nah de yuN sab se hansna bolana
ja chuka bachpan zara achchha bura samjha karo

achcha sheAr hei, bahut khoob, waah waah.

lab kushaai men hamari aapki touheen hai
waqifulasraar ho to mudduAa samjha karo

waaqif-ul-Haal ki TaraH waaqifulasraar kehnaa ghalaT nahiN lekin jab vazn meiN koii farq nahiN paRrahaa hei to behtar hougaa ke aap waaqif-e-asraar isteAmaal kareN.
SheAr bahut achchaa heii, waah waah.

khail yeh hargiz nahin hai dil se aise khailna
lag bhi sakti hai kisi ki badduAa samjha karo

SheAr bilkul SaHeeH hei. Meri nazar meiN agar pahlaa miSraA yooN hou to behtar hougaa:
khelnaa dil se hamaare ik tamaasha to nahiN
Achchaa sheAr hei. Bahut khoob.

rind o zaahid aa gaye is moR tak to saath saath
ab badal jayega inka raastah samjha karo

Achcha sheAr hei.

daaGh nah lag jaye koi daman e bedaaGH par
qurb meN achchha hai thoRa faaSlah samjha karo

"nah" ko "naa" ke talaffuz se paRhnaa zaroori hourahaa hei. Is liye aap pahle miSreA ko yooN kerleejiye:
lag nah jaaye daagh koii daaman-e-bedaagh per
Bahut achchaa sheAr hei, waah waah.

giryah e shaam o sahar ke heN bahane saikRoN
kyuN bahate hen yeh durr e bebaha samjha karo

Is sheAr meiN agar aap yeh kehnaa chaah rahe heiN "ham yeh durr e bebahaa kiyuN bahaate heiN" to pahle miSreA ko yooN kehnaa paRega:
giryah e shaam o sahar ke saikRoN asbaab heiN
agar aap meHboob se kehnaa chaahte heiN to pahle miSreA ko jaisaa hei waisaa hi rakhkar doosre misre meiN "heiN" ki jagah "ho" banaadeejiye.
Achchaa sheAr hei.

lag gai hai KHouf e ruswaai se hoNtoN par muhar
tum nigaah e shoq ki har ilteja samjha karo

Pahle miSreA meiN lafz "muhar" ghalat hei. "muhr" SaHeeH lafz hei. Is liye pahle miSreA ko yooN kerdeejiye:
Khauf e ruswaayi se lab per lag gayi muhr-e-sukoot

SheAr achcha hei. Waah waah.

qadr hojati hai kam milne se aise baar baar
aur us par zhar hai shikwah gilah samjha karo

Achcha sheAr hei go keh bahut se shoAaraah kaa yeh khayaal houtaa hei aapus ke gile shikwaoN se muHabbat aur dousti meiN izaafah houtaa hei.

yeh takabbur aur itna zaAm aaKHir kisliye
hai bohat kamzor nafsi silsilah samjha karo

Achcha sheAr hei. Waah waah.

likh rahe ho kyuN Husaini is qadar GHazleN Tweel
zabT e qaari ki hai koi intha samjha karo

MaqTaA bhi bahut khoob hei. Waah waah.


Aapka MukhliS,
Nazir.

[khozema husaini]

mohtaram nazir saheb
men aap ka tah dil se mamnoon hoon bohat bohat shukriyah
Husaini

[khozema husaini]

janab mehtab qadr saheb
ghazal ki pasandeedgi ka bohat bohat shukriyah
Husaini