HiSaar-e-teergee meN ghir gae haiN rehnuma gum hai.

[Muzaffar Ahmad Muzaffar]

moHtaram sathiyo aadaab!

ik tazah Ghazal pesh-e-khidmat hai.


Ghazal


1.guThan hai dhund hai dam ghuT raha hai rastah gum hai

HiSaar-e-teergee meN ghir gae haiN rehnuma gum hai.


2.kahaaN hai be yaqeeni meN dua'aeeN maNgne wala

t^alat^um meN ghiree jate hai kashtee na khuda gum hai.


3.sar-e-meHfil laga to dee hai tere hath par mehNdee

hathelee par jame kiyooN naqsh-e-gul rang-e-Hina gum hai.


4.maiN kese laoT ke aaoN batao dasht-e-ulfat se

sarab-e-aarzo hai samne aor naqsh-e-pa gum hai.


5.ta'jub hai keh tareekh-e-gulistaaN meN sabhee khuch hai

magar khun-e-shaheedan-e-wafa ka tazkirah gum hai.


6.ilahee le nah Dube yeh taGhaful kee ada un kee

faSeel-e-jaaN giree jatee aor mushkil kusha gum hai.


7.woh mujh ko dekhta hai gar to mere rubaru aae

maiN ik muddat se sar bah sajdah hoN lekin khuda gum hai.


8.maiN khud ko dekh looN ik bar to pehchaan looN shayad

jo chehrah DonD laya hooN to logo aae'nah gum hai.


9.meree SeHrah nawardee ka yaqeeN aata naheeN un ko

keh sar se gard-e-reh aor paoN ka har aablah gum hai.


10.takallum ke liye kuch hosh bhee darkar hota hai

muzaffar kiya karooN a'rZ^-e-tamanna Hafiz^ah gum hai.


muz^affar aHmad muz^affar[/b][/color][/size]

[Abdullah Nazir]

MuHtarami
Muzaffar Ahmed Muzaffar SaaHib,

PurkhulooS Tasleemaat,

Bahut dinaoN baAd aapko urdubandhan per dekhkar khushi houi. Aap ki nayi takhleeq per nazar paR uskaa itnaa muTaaliAah nah housakaa ke us per tafseeli tabSirah karsakuN. Waqt ki tangi ki vajh se majboor hooN.

Meri dili daad aur mubaarakbaad qubool farmaayhiye.


Aapka MukhliS,
Nazir.

[zmufti]

buhat khoob
Muzaffar bhai
ghazal k liye daad qabool kijye
regards
zmufti

[Abdullah Nazir]

MuHtarami
Muzaffar Ahmed Muzaffar SaaHib,

PurkhulooS Tasleemaat,

Bahut dinaoN baAd aapko urdubandhan per dekhkar khushi houi. Aap ki nayi takhleeq per nazar paR uskaa itnaa muTaaliAah nah housakaa ke us per tafseeli tabSirah karsakuN. Waqt ki tangi ki vajh se majboor hooN.

Meri dili daad aur mubaarakbaad qubool farmaayhiye.

Note: Aaj bhi waqt ki tangi hei lekin aapki ghazal dobarah paRhkar chaahtaa hooN ke tafSeeli tabSirah karuN lekin do chaar din lag jaayenge. Aapki dobaarah irsal kardah ghazal ko miTaarahaa hooN.



Aapka MukhliS,
Nazir.