Sher ke doosre misre ke pehle/aakhri alfaaz se sher kahiye!

Post by **Hashmat Usmani** » Mon Dec 20, 2004 5:23 am

APNAA

apnaa aHvaal-e-dil-e-zaar, kahuuN yaa na kahuuN?
hai Hayaa man'e-e-izhaar, kahuuN yaa na kahuuN?

Ghaalib

lafze-e-"hai" ya "kahuuN" se agla she'r marHamat farmaaiye, shukria.

Post by **Ibn-e-siddique** » Mon Dec 20, 2004 5:33 am

hai

hai dil ke liye maut masheenoN ki Hukoomat
ahsaas-e-muravvat ko kuchal dete haiN aalaat

aHsaas ya aalaat :D

Post by **Hashmat Usmani** » Mon Dec 20, 2004 5:47 am

AI'HSAAS

ai'Hsaas 'inaayat kar aasaar-e-musiibat kaa
im-roz kii shorish meN andesha-e-fardaa de!

'allamah Iqbaal

lafze-e-"im-roz" ya "de" se agla she'r marHamat farmaaiye, shukria.

Post by **Ibn-e-siddique** » Mon Dec 20, 2004 6:26 am

de

de daad ae falak dil-e-Hasrat parast ko
haaN kuch na kuch talaafi-e-maafaat chaahiye

ghalib

Post by **Hashmat Usmani** » Mon Dec 20, 2004 7:02 am

CHAAHIYE

chaahiye achchhoN ko jitnaa chaahiye
yeh agar chaaheN to phir kia chaahiye!

Ghaalib

lafze-e-"hai" ya "chaahiye" se agla she'r marHamat farmaaiye, shukria.

Post by **Ibn-e-siddique** » Mon Dec 20, 2004 7:47 am

yeh na thi hamaari qismat ke visaal-e-yaar hota
agar aur jeete rehte yehi intizaar hota

ghalib

Post by **Hashmat Usmani** » Mon Dec 20, 2004 10:59 am

AGAR

agar-cheh thaa yeh iraada, magar Khuda kaa shukr
uThaa sakaa na nazaakat se gul_badan takiiya!

Ghaalib

lafze-e-"uThaa" ya "takiiya" se agla she'r marHamat farmaaiye, shukria.

Post by **Ibn-e-siddique** » Mon Dec 20, 2004 12:18 pm

uthaa ker toR Daala aaiina Husn-e-raqaabat se
wo kal is per bigaR baiThe ke ham sa doosra kyuN ho

Post by **Shummu** » Mon Dec 20, 2004 12:23 pm

WO

wo dil ko churaa kar jo lage aaNkh churaane
yaaroN kaa gayaa un pe bharam aur ziyaada

Post by **Hashmat Usmani** » Mon Dec 20, 2004 1:21 pm

Shummu wrote:WO

wo dil ko churaa kar jo lage aaNkh churaane
yaaroN kaa gayaa un pe bharam aur ziyaada

salaam Shummu,

is she'r ko paRh kar dil hil kar rah gayaa. is she'r se kitnii yaadeN joRii huii haiN, hai na?

Khair, is laRii ko aage baRhaate huye yeh she'r pesh-e-Khidmat hai:

yaaroN

yaaro Khataa mu'aaf karo, maiN nashe meN huN
sheeshe meN mai, mai meN nashaa, maiN nashe meN huuN!

Ameer Minaaii

lafze-e-"sheeshe" ya "huuN" se agla she'r marHamat farmaaiye, shukria.

Post by **Ibn-e-siddique** » Mon Dec 20, 2004 9:15 pm

hooN garmi-e-nishaat-e-tasavvur se naghma saNj
maiN andaleeb-e-gulshan, na.aafreeda hooN

ghalib

Post by **Hashmat Usmani** » Tue Dec 21, 2004 12:26 am

maiN

maiN huN aur afsurdagii kii aarzoo, "Ghaalib!", ki dil
dekh kar tarz-e-tapaak-e-ai'hl-e-duniyaa jal gayaa!

Ghaalib

lafze-e-"dekh" ya "gayaa" se agla she'r marHamat farmaaiye, shukria.

Post by **Ibn-e-siddique** » Tue Dec 21, 2004 4:15 am

dekh to dil se ke jaaN se uThta hai
ye dhuaaN sa kahaaN se uThta hai

Meer

Post by **Hashmat Usmani** » Tue Dec 21, 2004 5:19 am

yeh

yeh masaa'il-e-tasavvuf, yeh tiraa bayaan, "Ghaalib!"
tujhe ham walii samajhte jo na baadah_Khowaar hotaa!

Ghaalib

lafze-e-"tujhe" ya "hotaa" se agla she'r marHamat farmaaiye, shukria.

Post by **Ibn-e-siddique** » Tue Dec 21, 2004 5:29 am

hotaa hai nihaaN gard meiNn sehraa mere hote
ghistaa hai jabeeN Khaak pe daryaa mere aage

ghistaa ya aage

ghalib