قارئین کی خدمت میں خیال کا آداب ایک تازہ کلام کے ساتھ حاضر خدمت ہوں امید ہے پسند آئے گا
اپنی آرا سے نوازیے شکریہ
عرض کیا ہے
۔۔۔۔۔۔۔۔۔۔۔۔۔۔۔۔۔
ستمگر نے ستم ڈھایا تو ہوتا
زمانے کو نظر آیا تو ہوتا
مجھے نفرت سے تم دھتکار دیتے
کہ تم سے کچھ صلہ پایا تو ہوتا
تمہیں مجھ سے تعلّق توڑنا تھا
کسی سے کچھ کہلوایا تو ہوتا
خفا ہو کر کہاں کو چل دیے تم
غَلط تھا جو بھی سمجھایا تو ہوتا
دکھاتا ہے سدا اوقات آخر
کہیں آئینہ شرمایا تو ہوتا
سفر دشوار ہے راہیں کٹھن ہیں
یہ سب پہلے سے بتلایا تو ہوتا
کمایا تم نے سب دنیا کی خاطر
کہ عقبیٰ کا بھی سرمایا تو ہوتا
کوئی تم سے محبت کیسے کرتا
تمہیں کوئی پسند آیا تو ہوتا
خیالؔ ایسے ہی مجنوں بن گئے ہو
کسی سے عشق فرمایا تو ہوتا
۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ