زندگی کہتی ہے آ گے کا سفر ہے باقی

[ismail ajaz]

قارئین کرام ایک ۴ فروری ۲۰۲۳ میں لکھا کلام پیشِ خدمت ہے امید ہے پسند آئے گا
عرض کیا ہے
۔۔۔۔۔۔۔۔۔۔۔۔۔۔۔۔۔۔
اک ترے در سے جڑی میری نظر ہے باقی
تیری رحمت سے دعاؤں میں اثر ہے باقی

پھر چلا کوئی اگر تیرِ نظر ہے باقی
دل تو زخمی ہے مگر میرا جگر ہے باقی

جھانکتے رہتے ہیں ہم مُڑ کے کہیں ماضی میں
زندگی کہتی ہے آ گے کا سفر ہے باقی

میں گِھرا رہتا ہوں دن رات اسی الجھن میں
کن مراحل سے ترا ہونا گزر ہے باقی

مبتلا لوگ خرافاتِ مسلسل کیوں ہیں
خود کی پروا ہے نہ کچھ ہوشِ دِگرہے باقی

آپ نفرت کی حدیں پار تو کر کے دیکھیں
ہم میں الفت کو نبھانے کا ہنر ہے باقی

امتحاں لیتے رہیں آپ ہمارا صاحب
جب تلک جان لُٹانے کو یہ سر ہے باقی

کوئی انسان کسی کی نہیں تذلیل کرے
شرم کا تھوڑا سا احساس اگر ہے باقی

ختم ہو جائے گا اک روز جو مر کر یارو
موت سے مَعْرَکَہ آرائی کا ڈر ہے باقی

جانتے جائیے جب جائیے دنیا سے خیالؔ
آخرت میں بھی کہیں آپ کا گھر ہے باقی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ