naz^m: shab-gaZeedah saHar

[Sarwar A. Raz]

yaaraan-e-meHfil: aadaab-o-tasleemaat!

aaj hee ek naz^m ("shab-gaZeedah saHar") huyee hai jo pesh kar rahaa hooN. aap kee raaYe kaa intiz^aar rahe gaa. mushkil alfaaz^ ke ma'nee likh` diYe haiN. mumkin hai keh kisee ko Z^aroorat ho.

Sarwar A. Raz "Sarwar"
==========================

SHAB-GAZEEDAH SAHAR

shab-gaZeedah hai saHar, us peh yeh tanhaayee hai!
zindagee kh`eeNch ke mujh` ko kahaaN le aayee hai?

dil giraaN-Haal, jigar soKhtah , lab haiN Khaamosh!
doosroN kee Khabar ab aur nah hee apnaa hosh!
i'shq Hairaan-o-pareshaan hai HirmaaN-bar-dosh!
Husn aur us kee ra,o'onat! keh hai ikraam-farosh!
waqt ne kar diyaa har lamHah-e-guZaraaN bad-hosh!
zindagee Hasrat-e-naakaam kee hai Halqah-bagosh!
har Khudaa apnee Khudaayee ke nashe meN madhosh!
ab yahaaN koyee naheeN gosh-bar-aawaaz-e-sarosh!

aur aise meN tiree yaad chalee aayee hai!
=========================
shab-gaZeedah = raat kee kaaTee (maaree) huyee
giraaN-Haal = buree Haalat meN
soKhtah = jalaa huwaa
HirmaaN = Gham, ranj
dosh = kandh`aa
HirmaaN-bardosh = kandh`oN par Gham kaa bojh` liYe
ra,o'onat = Ghuroor (=arrogance)
ikraam-farosh = apnee muHabbat faroKht karne waalaa
lamHah-e-guZaraaN = guZartaa huwaa waqt
Halqah = bundah (ring)
Halqah-bagosh = kaan meN kisee ke naam kaa bundah pehne (=us kaa Ghulaam)
gosh-bar-aawaaz = aawaaz par kaan lagaaYe
sarosh = farishtah

[najma]

janaab sarwar a r :sarwar: sahib!
assalam-o-alaikum
hasb-e-maa,mool aap ka ye kalaam bhi umdah hay.bohat khoob aamad hay.
daad qubool kijiye ga
ek arz hay:
maiN wazahat tio naheeN kar saktii, lekin zehn meiN kaheeN yuuN ubharta hay keh

shab-gaZeedah hai saHar, us peh yeh tanhaayee hai!
zindagee kh`eeNch kar mujh` ko kahaaN le aayee hai?

(zindagii kh,eeNch kar) meiN(''kar'' ki bajaey''ke'' ho to mujhe adaaigii meiN mazeed sahoolat mehsoos huee)
plz ise tanqeed na jaaniyega, sirf apnii ma,loomaat meIn izafa chah,tee hooN.
kalaam be-had pasand aayaa hay, ek baar phir dilii daad qubool farmaiyye
khair andesh
najma

[tahira Masood]

yaaraan-e-meHfil: aadaab-o-tasleemaat!

aaj hee ek naz^m ("shab-gaZeedah saHar") huyee hai jo pesh kar rahaa hooN. aap kee raaYe kaa intiz^aar rahe gaa. mushkil alfaaz^ ke ma'nee likh` diYe haiN. mumkin hai keh kisee ko Z^aroorat ho.

Sarwar A. Raz "Sarwar"
==========================

SHAB-GAZEEDAH SAHAR

shab-gaZeedah hai saHar, us peh yeh tanhaayee hai!
zindagee kh`eeNch kar mujh` ko kahaaN le aayee hai?

dil giraaN-Haal, jigar soKhtah , lab haiN Khaamosh!
doosroN kee Khabar ab aur nah hee apnaa hosh!
i'shq Hairaan-o-pareshaan hai HirmaaN-bar-dosh!
Husn aur us kee ra,o'onat! keh hai ikraam-farosh!
waqt ne kar diyaa har lamHah-e-guZaraaN bad-hosh!
zindagee Hasrat-e-naakaam kee hai Halqah-bagosh!
har Khudaa apnee Khudaayee ke nashe meN madhosh!
ab yahaaN koyee naheeN gosh-bar-aawaaz-e-sarosh!

aur aise meN tiree yaad chalee aayee hai!
=========================
shab-gaZeedah = raat kee kaaTee (maaree) huyee
giraaN-Haal = buree Haalat meN
soKhtah = jalaa huwaa
HirmaaN = Gham, ranj
dosh = kandh`aa
HirmaaN-bardosh = kandh`oN par Gham kaa bojh` liYe
ra,o'onat = Ghuroor (=arrogance)
ikraam-farosh = apnee muHabbat faroKht karne waalaa
lamHah-e-guZaraaN = guZartaa huwaa waqt
Halqah = bundah (ring)
Halqah-bagosh = kaan meN kisee ke naam kaa bundah pehne (=us kaa Ghulaam)
gosh-bar-aawaaz = aawaaz par kaan lagaaYe
sarosh = farishtah

waaaaaaaaaaaaaaaaaaah zabardast!!!!!
=D>

alfaaz kaa intekhaab aur bohat ache mazaameen nikaale heN aap ne

daad Hazir hai.

khush rehiay

wassalam

[Sarwar A. Raz]

Najma SaaHebah:aadaab!

daad aur tabSireh kaa shukriyah. tanqeed kaa Haq sab ko baraabar kaa hai aur aap kee tanqeed se mujh` ko koyee taraddud naheeN hai! "kar" ke bajaaYe :ke: kiyaa jaa saktaa hai. bal.k maiN kiye detaa hooN. tajweez ke liYe mamnoon hooN.

Sarwar A. A. Raz "Sarwar"

[Sarwar A. Raz]

Tahira SaaHebah:aadaab!

naz^m kee pasandeedagee aur daad kaa dilee shukriyah qubool keejiYe. aap kee :aaNkheN: waalee Ghazal dekh`ee th`ee. daad yaheeN diYe detaa hooN. waqt milaa to us par shaayad likh`ooN!

Sarwar A. Raz :Sarwar:

[Sarwar A. Raz]

Sara SaaHebah:aadaab!

nawaazishaat ke liYe mamnoon hooN.

Sarwar A. Raz :Sarwar:

[Sarwar A. Raz]

mukarramee Najm SaaHeb: aadaab!

naz^m kee paZeeraayee kaa dilee shukriyah qubool keejiYe. aap kee :lut^f: waalee Ghazal dekh`ee th`ee aur us kee takmeel kaa muntaz^ir hooN!

Sarwar A. Raz :Sarwar:

[fatimah]

aslaam_u_alikam

shab-gaZeedah hai saHar, us peh yeh tanhaayee hai!
zindagee kh`eeNch ke mujh` ko kahaaN le aayee hai?


Mashallah bohat khub.
ustaad e mohtaram aap ki yeh nazm aur khaas tor per yeh sher behad pasand aayaa.

daad qubool kijiye.
shukriya