Khata hoti hai saahib aadmi say ...Guz # 8

Tarhi Moshaairah -ShoAaraa aur Shayeraat kii TabAaazmayi ke liye

Moderator: Muzaffar Ahmad Muzaffar

Post Reply
nigaah
-
-
Posts: 44
Joined: Sun Jan 02, 2005 12:55 pm

Khata hoti hai saahib aadmi say ...Guz # 8

Post by nigaah »

Assalam alaikum

kafi taveel arsay baad aap sab say muKhtaib hooN .... waja taaleemi masroofiyaat haiN jin say inshaAllah November main kaamyaabi ke sath faraaGhat naseeb hogi....

tab tak isi tarah taveel Ghair haaziri ke sath ek nikammay bachay ki tarah forum per aaya karooNgi....aaj tou ghar ka kaam(homework) kar ke laai hooN ...so haazir hai.....:)

mujhay ye poochna tah zindagi say
"yehi tera rawayya hai sabhi say...?"

jawaab aaya,"jo naadaN haiN wo Khush haiN
ye shikwa kar too apni aagahi say"

wafa jesi Khata, maana, baRi hai
Khata hoti hai saahib aadmi say

badal bethay thay wo mauzoo achaanak
muhabbat tak jab aaya, dil lagi say

jo hanstay haiN bohut, chehroN pe unkay
maiN dukh paRhti hooN saaray Khamushi say

gilay sab bay asar karta gaya wo
jawaaban muskuraa kar saadgi say

hamaiN aadat si hoti jaa rahi hai
hazaaroN baar hum guzray haiN jee say


Nigaah
Top
Star Mind
-
-
Posts: 365
Joined: Sat Dec 11, 2004 11:39 pm
Location: Balochistan
Contact:
Contact Star Mind

Re: Khata hoti hai saahib aadmi say ...Guz # 8

Post by Star Mind »

nigaah wrote:Assalam alaikum

kafi taveel arsay baad aap sab say muKhtaib hooN .... waja taaleemi masroofiyaat haiN jin say inshaAllah November main kaamyaabi ke sath faraaGhat naseeb hogi....


W/salaam

aaKhir kaar aap aa hi gayeeN ! bohut Khushee hoi aap ko itne a'rSe baaa'd dekh kar ! , ham intezaar kareNge , kyoNke aap ki taHreeroN maiN ham apne zaqu ka a'ks dekhte haiN :-)


mujhay ye poochna tah zindagi say
"yehi tera rawayya hai sabhi say...?"

waah bohut Khoob ! aap ka ye andaaz bohut hi pasand aayaa ! aek jaariHaana andaaz ! bohut Khoob ! :-)

jawaab aaya,"jo naadaN haiN wo Khush haiN
ye shikwa kar too apni aagahi say"

bohut Khoob ! zindagee ka jawaab aap ne paaliyaa ! aur woh bhi aagahii se ! nehaayat u'mdah ! kyaa baat hai ! mubaarak ho :-)

wafa jesi Khata, maana, baRi hai
Khata hoti hai saahib aadmi say

girah to aap hamesha hi Khoob lagaati aarahee haiN ! daad Haazir hai :-)

badal bethay thay wo mauzoo achaanak
muhabbat tak jab aaya, dil lagi say

kyaa kehney ! naa jaane kyoN mujhe apna aek matla' yaad aayaa

"muasam-e-dil badal na jaaye kaheeN
tuu hi dil se nikal na jaaye kaheeN " ! :roll:

jo hanstay haiN bohut, chehroN pe unkay
maiN dukh paRhti hooN saaray Khamushi say

bohut Khoob ! chehroN ko paRhna har kisee k bas ki baat nahiN !

gilay sab bay asar karta gaya wo
jawaaban muskuraa kar saadgi say

kyaa tewar haiN is shea'r k waah ! ab to aap ki book ka shiddat se intezaar hai :-)

hamaiN aadat si hoti jaa rahi hai
hazaaroN baar hum guzray haiN jee say


Nigaah

guzree haiN jee se ....

waah , mujhe Faiz ki yaad aagayee ! aaKhree shea'r bhi nehaayat Khoob hai ! balke laa-jawaab hai !

agar aap maqta' bhi add karteN to kyaa jaataa aap ka :cry:

maHroom reh gaye ham :cry:

nigaah SaaHiba ,

aap ki mushaai'ra maiN Ghazal aur ab ye Ghazal ......ham to qaai'l hogaye aap k , balke ab aap hameN apne maddaHoN k Saf maiN shaamil kejeyega ! Ghazal har lihaaz bohut Khoob hai ! nehaayat pasand aayee !
tamaam ash;aar apnee apnee jagal Khoob haiN !

daad jitnee aap chaaheN qabool kejeyga ! shukriya

AH

Zia Baloch
Dikhaadi shaan, phir ahl-e-chaman ko, Be-niyaazi ki

Khamoshi se jhatak kar, aaj phir, dast-e-sabaa maiN ne

Zia Baloch
Top
nigaah
-
-
Posts: 44
Joined: Sun Jan 02, 2005 12:55 pm

Post by nigaah »

aaKhir kaar aap aa hi gayeeN ! bohut Khushee hoi aap ko itne a'rSe baaa'd dekh kar ! , ham intezaar kareNge , kyoNke aap ki taHreeroN maiN ham apne zaqu ka a'ks dekhte haiN
ji janab!...aaKhir kaar maiN aahi gai buray waqt ki tarah...:).....aap ke aala zauq ko taskeen ponhchaaye ...ye hamaari tukbandi ki haisiyat kahaN.... is qadarafzaai ke liye saraapa tashakkur hooN....
mujhay ye poochna tah zindagi say
"yehi tera rawayya hai sabhi say...?"

waah bohut Khoob ! aap ka ye andaaz bohut hi pasand aayaa ! aek jaariHaana andaaz ! bohut Khoob !
is bharpoor daad ke liye bay hud nawaazish.....
jawaab aaya,"jo naadaN haiN wo Khush haiN
ye shikwa kar too apni aagahi say"

bohut Khoob ! zindagee ka jawaab aap ne paaliyaa ! aur woh bhi aagahii se ! nehaayat u'mdah ! kyaa baat hai ! mubaarak ho
ye shair maiN shaamil karna hi nahiN chaahti thi...kuch Khush fehmi ki boo aati hai is shair say....goya maiN Khud ko aagahi ka tamGha khud hi inaayat kar rahi hooN :).....phir bhi aap nay hosla baRha diya ...acha laga...
wafa jesi Khata, maana, baRi hai
Khata hoti hai saahib aadmi say

girah to aap hamesha hi Khoob lagaati aarahee haiN ! daad Haazir hai
ye baRay aizaaz ki baat hai ke itnay forums per bohut say shoraa-o-shaairaat ko paRhtay rehnay ke baawujood, aur meri taveel-ul-mee'aad Ghair haaziri ke bawujood aap ko yaad hai ke maiN girhaiN kesi lagaati rahi hooN :).... nawaazish aapki...
badal bethay thay wo mauzoo achaanak
muhabbat tak jab aaya, dil lagi say

kyaa kehney ! naa jaane kyoN mujhe apna aek matla' yaad aayaa

"muasam-e-dil badal na jaaye kaheeN
tuu hi dil se nikal na jaaye kaheeN " !
bazaahir masoom sa Khadsha hai....albatta yaqinun bohut naraaz hoga sun kar....:).....aur Khoob ittefaq hai ke mujhay aap ka matla paRh kar Nasir Kazmi sahab ka ek matla yaad aaya ....

niyyat-e-shouq bhar na jaaye kahiN
too bhi dil say uter na jaaye kahiN..
jo hanstay haiN bohut, chehroN pe unkay
maiN dukh paRhti hooN saaray Khamushi say

bohut Khoob ! chehroN ko paRhna har kisee k bas ki baat nahiN !
baja farmaaya aap nay.....lekin jo bohut haNstay haiN ...kabhi un ke chehroN ko Ghour say dekhiye...baRay aasan hotay haiN aisay loag...:)...wo ek mash'hoor-e-zamaana Ghazal hai...

tum itna jo muskura rahay ho
kia Gham hai jisko chupa rahay ho
gilay sab bay asar karta gaya wo
jawaaban muskuraa kar saadgi say

kyaa tewar haiN is shea'r k waah ! ab to aap ki book ka shiddat se intezaar hai
aray aray....janab!!....aaj aap nay kia mujhay sharminda karnay ki thaan li hai.....pehle hi aap ki itni hosla afzaai mujhay paani paani kar rahi hai...
hamaiN aadat si hoti jaa rahi hai
hazaaroN baar hum guzray haiN jee say


Nigaah

guzree haiN jee se ....

waah , mujhe Faiz ki yaad aagayee ! aaKhree shea'r bhi nehaayat Khoob hai ! balke laa-jawaab hai !
aur aap ka daad dene ka andaaz lajawaab hai!.... KhuamaKhuaah banda Khud ko baRa shaair samajhnay lagay....:)

agar aap maqta' bhi add karteN to kyaa jaataa aap ka

maHroom reh gaye ham

nigaah SaaHiba ,

aap ki mushaai'ra maiN Ghazal aur ab ye Ghazal ......ham to qaai'l hogaye aap k , balke ab aap hameN apne maddaHoN k Saf maiN shaamil kejeyega ! Ghazal har lihaaz bohut Khoob hai ! nehaayat pasand aayee !
tamaam ash;aar apnee apnee jagal Khoob haiN !

daad jitnee aap chaaheN qabool kejeyga ! shukriya

AH

Zia Baloch
sachi baat hai ke maqtaa koi acha soojha hi nahiN...aur maiN shaairi maiN zabardasti ki qaail nahiN...phir meri azli kaahili....har tarahi mushaairay maiN aakhiri Ghazal meri hi hoti hai...aakhiri din beth kar likhti hooN ...ab aamad hi ain waqt per ho tou kia karay koi...

aur ye jo aap nay "qaail honay" aur " maddahoN ki saf maiN shaamil honay" ki baat ki....to yehi kahooNgi.... Khaaksaar ko us ki jaga per hi rehnay dijye ....bila waja kursi tang ho jayegi jis per maiN baraajmaan hooN....:)...

aap ke is Khuloos ka bay hud shukriya.....sach much bohut acha lagta hai jab aap jese Khus apna ek dilkash andaaz-e-bayaN rakhnay walay shaair saraahtay haiN ....:)

Nigaah
Top
User avatar
Shummu
-
-
Posts: 733
Joined: Mon Dec 13, 2004 11:41 am
Contact:
Contact Shummu

Re: Khata hoti hai saahib aadmi say ...Guz # 8

Post by Shummu »

nigaah wrote:Assalam alaikum

kafi taveel arsay baad aap sab say muKhtaib hooN .... waja taaleemi masroofiyaat haiN jin say inshaAllah November main kaamyaabi ke sath faraaGhat naseeb hogi....

tab tak isi tarah taveel Ghair haaziri ke sath ek nikammay bachay ki tarah forum per aaya karooNgi....aaj tou ghar ka kaam(homework) kar ke laai hooN ...so haazir hai.....:)

mujhay ye poochna tah zindagi say
"yehi tera rawayya hai sabhi say...?"

jawaab aaya,"jo naadaN haiN wo Khush haiN
ye shikwa kar too apni aagahi say"

gilay sab bay asar karta gaya wo
jawaaban muskuraa kar saadgi say


Nigaah

wah nigaah sis wah..badi din baad aap ka deedaar naseeb hua...kaisi hain aap? main khud kaafi arsa net se gayab rhai thi chunki india gayi hui thi magar ab jab se wapis aayi hono to sab jagah reular hoon... aap ki ghazal ke pehle do sher mein mukaalmaana andaaz bahut bhala laga.... aur woh saadgi wala sher bhi bahut khoob....
badal bethay thay wo mauzoo achaanak
muhabbat tak jab aaya, dil lagi say
sher bahut umda hai magar is mein shuturgurbah hai....

ise aise theek kar lijiye...

badal baiThaa tha woh mauzoo achaanak
muhabbat tak jab aaya,dil lagii se!!

ya aise..

badal baiThe the woh mauzoo achaanak
muhabbat tak jab aaye,dil lagii se!!


ek baar phir daad hazir hai is umda kalaam pe..aati rahiyega!

Shumaila

Koi pooche humse hamaari haalat ka sabab
to ashk baha kar bhi baat adhoori reh jati hai

Waqt jaise kahin thehar sa gaya hai
Na Gham jaata hai na khushi aati hai
Top
zmufti
-
-
Posts: 594
Joined: Fri Apr 08, 2005 6:28 am
Location: lahore
Contact:
Contact zmufti

Post by zmufti »

Nigah jee
aap ki ghazal buhat pasand aayii
yeh sher buhat acha laga
mujhay ye poochna tah zindagi say
"yehi tera rawayya hai sabhi say...?"
take care
zarqa
Top
Star Mind
-
-
Posts: 365
Joined: Sat Dec 11, 2004 11:39 pm
Location: Balochistan
Contact:
Contact Star Mind

Post by Star Mind »

nigaah wrote:
badal bethay thay wo mauzoo achaanak
muhabbat tak jab aaya, dil lagi say

kyaa kehney ! naa jaane kyoN mujhe apna aek matla' yaad aayaa

"muasam-e-dil badal na jaaye kaheeN
tuu hi dil se nikal na jaaye kaheeN " !
bazaahir masoom sa Khadsha hai....albatta yaqinun bohut naraaz hoga sun kar....:).....aur Khoob ittefaq hai ke mujhay aap ka matla paRh kar Nasir Kazmi sahab ka ek matla yaad aaya ....

niyyat-e-shouq bhar na jaaye kahiN
too bhi dil say uter na jaaye kahiN..
Nigaah SaaHiba,

ham ne Nasir Kamzi k isee matla' se muta'accir ho kar isee Khyaal ko apne andaaz maiN bayaan karne ki koshish kii hai :oops: :grin:
mere Khyaal maiN is maiN koi buraayee nahiN hai ? :P

aap ne jis kacar-e-nafsee ka izhaar farmaaya hai woh mere leye koi nayee baat nahiN hai , yaqeen jaaneye , maiN ne KhaamKhwaah aisa nahiN kahaa , rasmee waah waah nahiN tha mera tabSira !

maiN ne jo kuch maHsoos kiyaa ! likkhaa !

is leye aap se guzaarish hai k aap apnee shaai'ree ki qadr Khud bhi pehchaaneye ! aur kasar-e-nafsee se guzrez kejeye ! :twisted:

shukriya

moKhliS:

Zia Baloch
Dikhaadi shaan, phir ahl-e-chaman ko, Be-niyaazi ki

Khamoshi se jhatak kar, aaj phir, dast-e-sabaa maiN ne

Zia Baloch
Top
nigaah
-
-
Posts: 44
Joined: Sun Jan 02, 2005 12:55 pm

Post by nigaah »

Quote:
badal bethay thay wo mauzoo achaanak
muhabbat tak jab aaya, dil lagi say


sher bahut umda hai magar is mein shuturgurbah hai....

ise aise theek kar lijiye...

badal baiThaa tha woh mauzoo achaanak
muhabbat tak jab aaya,dil lagii se!!

ya aise..

badal baiThe the woh mauzoo achaanak
muhabbat tak jab aaye,dil lagii se!!
nahi Shummu ji...ye shutr gurba nahi hai..

badal bethay thay wo mauzoo achanak
muhabbat tak jab aaya dil lagi say

yahan "aaya" mauzoo ke liey isemaal hua hai...na ke us shakhs ek liye....agar maiN "mauzoo" ka zikr na karti tou phir ye baat laagu hoti ...filhaal nahi ho rahi...

bohut shukriya ke aap nay is jaanib tawajju dilaai.....zehen maiN jo baat aaye bay jhijak keh leni chahiye ....:)

Nigaah
Top
User avatar
Shummu
-
-
Posts: 733
Joined: Mon Dec 13, 2004 11:41 am
Contact:
Contact Shummu

Post by Shummu »

oh achcha u mean "mauzoo" ..theek theek ab samajh gayi..:) sorry han....mujhe smajhne mein ghalti hui...thanx for the clarification!:)

Koi pooche humse hamaari haalat ka sabab
to ashk baha kar bhi baat adhoori reh jati hai

Waqt jaise kahin thehar sa gaya hai
Na Gham jaata hai na khushi aati hai
Top
User avatar
irfan barabankwi
-
-
Posts: 69
Joined: Sun Jan 02, 2005 6:25 pm
Location: jeddah
Contact:
Contact irfan barabankwi

Bahut achci ghazal kahi hei aap ne

Post by irfan barabankwi »

mohtaramah
NIGAH SAAHIABH
tasleemat

wah kamal hai. bahut hi achhi ghazal aapney pesh ki hai. meri bahut bahut daad qubool kareiN.

khair andaish

irfan barabankwi
iHtisab apne naqaayis ka mujhe aataa hei
Saare Aalam ki maiN taqseer kahaN tak dekhuN
Irfan Barabankwi.
Top
nigaah
-
-
Posts: 44
Joined: Sun Jan 02, 2005 12:55 pm

Post by nigaah »

zmufti wrote:Nigah jee
aap ki ghazal buhat pasand aayii
yeh sher buhat acha laga
mujhay ye poochna tah zindagi say
"yehi tera rawayya hai sabhi say...?"
take care
zarqa

bohut shukriya Zarqa....

aap ko shair pasand aaya.... samjhiye qadr baRh gai is ki :)...

Nigaah
Top
nigaah
-
-
Posts: 44
Joined: Sun Jan 02, 2005 12:55 pm

Post by nigaah »

Nigaah SaaHiba,

ham ne Nasir Kamzi k isee matla' se muta'accir ho kar isee Khyaal ko apne andaaz maiN bayaan karne ki koshish kii hai
mere Khyaal maiN is maiN koi buraayee nahiN hai ?
ji janab hargiz koi buraai nahiN hai....:)...aur shaairi maiN tou aisa hota hi hai.....ke ek hi Khayaal muKhtalif shora apnay apnay andaaz maiN baandhtay haiN.....
aap ne jis kacar-e-nafsee ka izhaar farmaaya hai woh mere leye koi nayee baat nahiN hai , yaqeen jaaneye , maiN ne KhaamKhwaah aisa nahiN kahaa , rasmee waah waah nahiN tha mera tabSira !

maiN ne jo kuch maHsoos kiyaa ! likkhaa !
ek baar phir bay hud nawaazish!..:)... mujhay poora yaqeen hai ke aap nay wohi likha jo aap ko laga......"rasmi waah waah" maiN itan Khuloos hota hai bhala?..:)

is leye aap se guzaarish hai k aap apnee shaai'ree ki qadr Khud bhi pehchaaneye ! aur kasar-e-nafsee se guzrez kejeye !


bay saaKhta hansi aayi ye paRh kar......aap nay tou daant hi diya ...:(....acha laga bohut aap ka phir say aana aur daantna bhi....shukriya

Nigaah
Top
nigaah
-
-
Posts: 44
Joined: Sun Jan 02, 2005 12:55 pm

Post by nigaah »

Shummu wrote:oh achcha u mean "mauzoo" ..theek theek ab samajh gayi..:) sorry han....mujhe smajhne mein ghalti hui...thanx for the clarification!:)

aray aray....ye sorry worry kia hota hai......

AISA HI KIA KARAIN .... jab bhi koi baat waazeh na ho Khaas tor say meri shaairi maiN ...thik hai na ?..:)

mujhay acha lagta hai jab koi apna Khayaal bay jhijak mujhay bata deta hai.....kiuNke maiN bhi aisa hi karti hooN ....

Nigaah
Top
nigaah
-
-
Posts: 44
Joined: Sun Jan 02, 2005 12:55 pm

Re: Khata hoti hai saahib aadmi say ...Guz # 8

Post by nigaah »

sara_j wrote:
nigaah wrote:Assalam alaikum

kafi taveel arsay baad aap sab say muKhtaib hooN .... waja taaleemi masroofiyaat haiN jin say inshaAllah November main kaamyaabi ke sath faraaGhat naseeb hogi....

tab tak isi tarah taveel Ghair haaziri ke sath ek nikammay bachay ki tarah forum per aaya karooNgi....aaj tou ghar ka kaam(homework) kar ke laai hooN ...so haazir hai.....:)

mujhay ye poochna tah zindagi say
"yehi tera rawayya hai sabhi say...?"

jawaab aaya,"jo naadaN haiN wo Khush haiN
ye shikwa kar too apni aagahi say"

wafa jesi Khata, maana, baRi hai
Khata hoti hai saahib aadmi say

badal bethay thay wo mauzoo achaanak
muhabbat tak jab aaya, dil lagi say

jo hanstay haiN bohut, chehroN pe unkay
maiN dukh paRhti hooN saaray Khamushi say

gilay sab bay asar karta gaya wo
jawaaban muskuraa kar saadgi say

hamaiN aadat si hoti jaa rahi hai
hazaaroN baar hum guzray haiN jee say


Nigaah
aek umdah kavish per daad qubool keejiye.

moshaire mein shirket karne ke liye aapka
shukriya ada karti hoon, umeed ke ainda bhi saath rahega.

mukhlis

sara

Nawazish Sara ji...aap nay Ghazal pasand ki ...dil Khush ho gaya....

shukriya ki qat'an zaroorat nahiN....is mushaairay maiN shareek hona Khud mere liye bohut Khushkun tajirba hai.....inshaALlah aayenda bhi aati rahooNgi....:)

Nigaah
Top
User avatar
Abdullah Nazir
-
-
Posts: 2681
Joined: Sat Dec 11, 2004 4:16 am
Location: Jeddah
Contact:
Contact Abdullah Nazir

Bahut khoob waah waah

Post by Abdullah Nazir »


MuHtaramah
Nigaah Saahibah,

Purkhuloos Tasleemaat,

Aapki ghazal bahut pasand aayi. Saare ke saare ashAaar bahut hii dilkash heiN. MaiN apni raaye dene meiN t'akheer ke liye muAaafi chaahtaa hooN.

Aapki ghazal paRhkar bahut luTfandouz houaa.

Meri jaanib se is kaamyaab koushish per daad aur mubaarakbaad qubool farmayiye.
[color\brown]

Aapka Mukhlis,
Nazir.
[/color]
Image
Top
nigaah
-
-
Posts: 44
Joined: Sun Jan 02, 2005 12:55 pm

Re: Bahut achci ghazal kahi hei aap ne

Post by nigaah »

irfan barabankwi wrote:mohtaramah
NIGAH SAAHIABH
tasleemat

wah kamal hai. bahut hi achhi ghazal aapney pesh ki hai. meri bahut bahut daad qubool kareiN.

khair andaish

irfan barabankwi

Shukriya....Irfan sahab....aap ke alfaaz ke liye bohut mamnoon hooN...

Nigaah
Top
Post Reply

Return to “Moshaairah”