Ghalib kii zameen meiN meri ghazal

[abdulqayyum sahil]

Muhtaramaat o muhtarameen
Ahbab-e-meHfil,


Aadaab o tasleemaat,

Mirza Ghalib ke aik misreA per maiN ne TaraHi ghazal kahi hei jo yahaN paish karne kii saAadat haasil karraha hooN.

Aapki giraNqadr aaraa kaa intizaar rahega.

G H A Z A L
Azhaan ke liye yeh tasavvur muHaal hei
"Aalam tamam Halqa-e-daam-e-khayaal hei"
Yeh sinf-e-dousti bhi jahaaN meiN Halaal hei
Ik dil meiN khooN sufaid hei ik dil meiN laal hei
LauH-e-jabeeN pah uski raqam yeh sawaal hei
YooN bazm-e-kaayinaat meiN koiee micaal hei
Mumkin nahiN hei lauTnaa kashti sawaar ka
Gehri samundaraoN se bhii chashm-e-ghazaal hei
KiyooN aaftaab-e-waqt hei naazaaN urooj per
Kehdo ke Anqareeb hii shaam-e-zavaal hei
Kooche se unke guzreN hawaayeN bhi baa-adab
Wo qadr-o-manzilat hei wo jaah o jalaal hei
Pesh-e-nazar hei jab se mirii ghairat-e-anaa
Jo dil meiN hei zabaan pah aanaa muHaal hei
Aiy saahil aaj gham hei ke be-baal o per hooN maiN
YooN tou leHaaz-e-naama-e-shaam-e-visaal hei.
======
Khair Andesh,
Saahil.

[Hashmat Usmani]

moHtaram janaab-e-"SaaHil" saaHib,

Ghaalib kii zameen meN aapkii Ghazal paRhi aur yaqeen jaaniye mujhe be_Had pasand aayii. aapne gireh Khoob lagaaii hai...aapkii Ghazal meN ustaadaanah rang nazar aataa hai...Allah kare zor-e-qalam aur ziyaada.

sabhii ash'aar ek se baRh kar ek haiN...masha Allah.

Hashmat

[Raji]

Ghalib kee iss mushkiL zameen per aap ka kalam daikh kar acha laga

Azhaan ke liye yeh tasavvur muHaal hei
"Aalam tamam Halqa-e-daam-e-khayaal hei"
"Azhaan" ka matlab agar aap bataa dein tu inaayat ho gi ke mujhe iss ka mafhoom nahien pata


Yeh sinf-e-dousti bhi jahaaN meiN Halaal hei
Ik dil meiN khooN sufaid hei ik dil meiN laal hei
Zabardast. bauth hee khoob

LauH-e-jabeeN peh uski raqam yeh sawaal hei
YooN bazm-e-kaayinaat meiN koiee micaal hei
Nice

Mumkin nahiN hei lauTnaa kashti sawaar ka
Gehri samundaraoN se bhii chashm-e-ghazaal hei
Wah bauth khoob

KiyooN aaftaab-e-waqt hei naazaaN urooj per
Kehdo ke Anqareeb hii shaam-e-zavaal hei
Wah wah wah bauth hee zabardast


Kooche se unke guzreN hawaayeN bhi baa-adab
Wo qadr-o-manzilat hei wo jaah o jalaal hei
Teak :)

Pesh-e-nazar hei jab se mirii ghairat-e-anaa
Jo dil meiN hei zabaan pah aanaa muHaal hei
Superb :)

Aiy saahil aaj gham hei ke be-baal o per hooN maiN
YooN tou leHaaz-e-naama-e-shaam-e-visaal hei.
MashaAllah kyaa baat hai. Majmoohi taur per aap kee yeh tarHee ghazal bauth pasand aahi so daad hazir-e-khidmat hai :)


Wassalam

Zahida Raees :Raji:

[Ibn-e-siddique]

Sahil saHib

janaab aap ki ye ghazal to pehle hi paRh li thi ,magar waqt per javaab na de sakaa, dar.asl main ye samajhta rahaa ke main aap ko muraqqa-e-daad-o-sitaaish pesh kar chuka hooN :)

lijiye, ab daad qubool kareN itni umda kawish per

amjad

[khozema husaini]

Muhtaramaat o muhtarameen
Ahbab-e-meHfil,


Aadaab o tasleemaat,

Mirza Ghalib ke aik misreA per maiN ne TaraHi ghazal kahi hei jo yahaN paish karne kii saAadat haasil karraha hooN.

Aapki giraNqadr aaraa kaa intizaar rahega.

G H A Z A L
Azhaan ke liye yeh tasavvur muHaal hei
"Aalam tamam Halqa-e-daam-e-khayaal hei"
Yeh sinf-e-dousti bhi jahaaN meiN Halaal hei
Ik dil meiN khooN sufaid hei ik dil meiN laal hei
LauH-e-jabeeN pah uski raqam yeh sawaal hei
YooN bazm-e-kaayinaat meiN koiee micaal hei
Mumkin nahiN hei lauTnaa kashti sawaar ka
Gehri samundaraoN se bhii chashm-e-ghazaal hei
KiyooN aaftaab-e-waqt hei naazaaN urooj per
Kehdo ke Anqareeb hii shaam-e-zavaal hei
Kooche se unke guzreN hawaayeN bhi baa-adab
Wo qadr-o-manzilat hei wo jaah o jalaal hei
Pesh-e-nazar hei jab se mirii ghairat-e-anaa
Jo dil meiN hei zabaan pah aanaa muHaal hei
Aiy saahil aaj gham hei ke be-baal o per hooN maiN
YooN tou leHaaz-e-naama-e-shaam-e-visaal hei.
======
Khair Andesh,
Saahil.

janaab sahilsaheb

aadaab
is khoobsoorat kawish ke liye dili daad hazir he
husaini