لوگ نفرت کو ہوا دیتے ہیں

[ismail ajaz]

قارئین کرام آداب عرض ہیں , ایک تازہ کلام پیشِ خدمت ہے امید ہے پسند آئے گا ،اپنی آرا سے نوازیے شکریہ
عرض کیا ہے
۔۔۔۔۔۔۔۔۔۔۔۔۔۔
اونچی دیوار اٹھا دیتے ہیں
لوگ نفرت کو ہوا دیتے ہیں

آپ منہ کھول کے اکثر سب کو
اپنی اوقات دِکھا دیتے ہیں

ہم مروّت میں نہیں کہتے کچھ
آپ الزام لگا دیتے ہیں

زندگی چار دنوں کا ہے کھیل
پھر بھی ہم اس کو گنوا دیتے ہیں

تم نے نفرت سے ہمیں دھتکارا
ہم تمہیں دل سے دعا دیتے ہیں

کیسے ہیں لوگ محبّت والے
دل میں جو آگ لگا دیتے ہیں

درد کچھ اور ہی بڑھ جاتا ہے
ہم کو جب آپ سزا دیتے ہیں

تم خیالؔ ان سے نہیں بات کرو
جو حقارت سے صدا دیتے ہیں
۔۔۔۔۔۔۔۔۔۔۔۔۔۔۔۔
آپ کی توجہ کا طلبگار
اسماعیل اعجاز خیالؔ